ہندوستانی ریلوے نے ایک تاریخی کارنامہ انجام دیا ہے۔ اب جلد ہی ٹرین میں ہی مسافروں کو اے ٹی ایم کی سہولت ملنے والی ہے اور اس کی شروعات ممبئی-منماڑ پنچوٹی ایکسپریس سے ہو بھی گئی ہے۔ یہ ملک کی پہلی ایسی ٹرین بن گئی ہے جس میں اے ٹی ایم کی سہولت دستیاب ہے۔پیسے نکالنے کے لیے اب شاید اسٹیشن پر اترنے کی ضرورت نہیں پڑے گی۔ ابھی تک آرام دہ کرسیوں سے لے کر موبائل فون چارجنگ اور لیمپ جیسی کئی جدید سہولتیں ٹرین میں ملتی رہی ہیں لیکن اب ریلوے نے ٹرینوں میں اے ٹی ایم یعنی آٹومیٹیڈ ٹیلر مشین کا ٹیسٹ شروع کر دیا ہے۔ حالانکہ یہ پوری طرح صاف نہیں ہے کہ یہ تجربہ وسیع پیمانے پر کب سے نافذ کیا جائے گا۔
سینٹرل ریلوے (سی آر) نے ممبئی-منماڑ پنچوٹی ایکسپریس میں تجربہ کے طور پر اے ٹی ایم لگایا ہے۔ افسروں نے منگل کو یہ اطلاع دیتے ہوئے بتایا کہ یہ اے ٹی ایم ایک نجی بینک کے ذریعہ فراہم کیا گیا ہے اور اسے اس ڈیلی ایکسپریس سروس کی ایمرجنسی چیئر کار کوچ میں نصب کیا گیا ہے۔ افسروں کے مطابق اسے جلد ہی مسافروں کے لیے دستیاب کرایا جائے گا۔وسطی ریلوے کے چیف انفارمیشن آفیسر سوپنل نیلا نے کہا کہ پنچوٹی ایکسپریس میں تجربہ کے طور پر اے ٹی ایم نصب کیا گیا ہے۔ ریلوے افسروں نے بتایا کہ یہ اے ٹی ایم کوچ کے پچھلے حصے میں ایک کیوبکل میں لگایا گیا ہے، جہاں پہلے عارضی پینٹری تھی۔ ٹرین کے چلنے کے دوران تحفظ اور پہنچ کو یقینی کرنے کے لیے ایک شٹر دروازہ بھی لگایا گیا ہے۔
افسر نے بتایا کہ اس کوچ میں ضروری تبدیلی منماڑ ریلوے ورکشاپ میں کیے گئے۔ پنچوٹی ایکسپریس ممبئی کے چھترپتی شیواجی مہاراج ٹرمینس اور پڑوسی ناسک ضلع کے منماڑ جنکشن کے درمیان روزانہ چلتی ہے۔ یہ ٹرین تقریباً 4 گھنٹے، 35 منٹ میں ایک طرف کا سفر پورا کرے گی۔
