ممبئی سے امرتسر جانے والی ’گولڈن ٹیمپل‘ ٹرین میں آج اس وقت افرا تفری کا ماحول پیدا ہو گیا جب اس میں دہشت گرد ہونے کی خبر پھیلی۔ بدھ کے روز یہ ٹرین متھرا جنکشن کے پلیٹ فارم نمبر 3 پر پہنچی تھی جب ٹرین کے اندر دہشت گرد ہونے کی اطلاع ملی۔ یہ ٹرین ممبئی سے دہلی کی طرف جا رہی تھی، لیکن دہشت گرد ہونے سے متعلق خبر ملتے ہی متھرا میں اسے روک کر تلاشی مہم شروع کی گئی۔
میڈیا رپورٹس کے مطابق دہشت گردانہ سرگرمی کی اطلاع ملنے کے بعد متھرا کے ایس پی سٹی سمیت کئی تھانوں کی فورس نے ٹرین کے اندر تلاشی مہم چلائی۔ ٹرین کی تقریباً 10 منٹ تک تلاشی لی گئی، لیکن کسی بھی دہشت گرد کی موجودگی دیکھنے کو نہیں ملی۔ فوری طور پر ٹرین کی تلاشی کے بعد ٹرین کو آگے روانہ کر دیا گیا ہے، لیکن ریلوے کی طرف سے ضروری احتیاطی اقدامات بھی اٹھائے گئے۔
موصولہ خبروں میں بتایا جا رہا ہے کہ جب ٹرین کو متھرا اسٹیشن سے روانہ کیا گیا تو ٹرین پر جی آر پی اور آر پی ایف کی ٹیم کو بھی سوار کیا گیا۔ چلتی ٹرین میں ہی چیکنگ کی جا رہی ہے اور اس جانچ میں ڈاگ اسکواڈ کے ساتھ ساتھ بی ڈی ایس کی ٹیم بھی مصروف ہے۔
