این سی پی لیڈرنواب ملک کو ملی عبوری ضمانت

نئی دہلی :سپریم کورٹ نے جمعہ کو مبینہ منی لانڈرنگ معاملے میں فروری 2022 سے جیل میں بند این سی پی کے سینئر لیڈر اور مہاراشٹر کے سابق وزیر نواب ملک کو آج بڑی راحت دیتے ہوئے میڈیکل گراؤنڈ پر عبوری ضمانت دے دی۔ نواب ملک گردے اور دیگر سنگین بیماریوں سے نبرد آزما رہے ہیں۔
سپریم کورٹ ججوں جسٹس انیردھ بوس اور جسٹس بیلا ایم ترویدی کی بنچ نے کہا کہ نواب ملک کا گردے اور دیگر بیماریوں کا علاج چل رہا ہے، اس لیے صحت کی بنیاد پر دو مہینے کے لیے عبوری راحت دی جا رہی ہے۔ بنچ نے اپنے حکم میں کہا کہ "ہم صرف میڈیکل گراؤنڈ پر ہی حکم جاری کر رہے ہیں اور کچھ نہیں۔
واضح رہے کہ انفورسمنٹ ڈائریکٹوریٹ نے نواب ملک کو فروری 2022 میں پی ایم ایل اے (پریونشن آف منی لانڈرنگ ایکٹ) کے تحت گرفتار کیا تھا۔ جمعہ کو ای ڈی نے سپریم کورٹ میں ضمانت کے لیے ان کی عرضی کی مخالفت نہیں کی۔ ملک کو ای ڈی نے انڈرورلڈ سے روابط کے ساتھ ملکیت کے سودے سے جڑے مبینہ منی لانڈرنگ معاملے میں گرفتار کیا تھا۔