رانچی: جھارکھنڈ کے وزیر اعلی ہیمنت سورین کے خلاف نازیبا تبصرے کے بعد بی جے پی کے رکن اسمبلی بھانو پرتاپ شاہی کے خلاف ایس سی-ایس ٹی قانون کے تحت مقدمہ درج کیا گیا ہے۔ رپورٹ کے مطابق منگل کے روز جے ایم ایم کارکن راجندر اوراؤں کی شکایت پر بی جے پی کے رکن اسمبلی بھانو پرتاپ شاہی کے خلاف گڑھوا ضلع کے رمنا تھانے میں ایس ٹی/ایس سی قانون کے تحت ایف آئی آر درج کی گئی ہے۔
راجندر اوراؤں نے شکایت میں کہا کہ 22 جولائی کو بی جے پی کے ایم ایل اے بھانو پرتاپ شاہی نے رانچی میں کارکنوں سے خطاب کرتے ہوئے جان بوجھ کر سی ایم ہیمنت سورین کو قبائلی ہونے کی وجہ سے توہین کرنے کی نیت سے کہا تھا کہ ’’انہیں گٹّا پکڑ کر کرسی سے اتاریں گے۔ایم ایل اے بھانو پرتاپ شاہی نے بی بی سی سے بات کرتے ہوئے اعتراف کیا کہ انہوں نے اپنی تقریر کے دوران لفظ ‘گٹا’ استعمال کیا تھا۔ بھانو پرتاپ شاہی کہتے ہیں، ’’ہماری علاقائی زبان میں گٹّا کا مطلب گریبان نہیں بلکہ کلائی ہوتا ہے، جب کہ گریبان کو ہمارے یہاں توٹا کہا جاتا ہے۔‘‘ انہوں نے کہا کہ جب کوئی شخص کرسی پر بیٹھتا ہے تو آپ اس کی ذات کو مخاطب نہیں کرتے بلکہ اس شخص کو مخاطب کرتے ہیں۔انہوں نے کہا کہ وزیر اعلیٰ کو کون نہیں کہتا کہ کرسی سے کھینچ کر اتار دیں گے، وقت آنے دیں کرسی الٹ دیں گے، یہ فطری زبان ہے۔ ایم ایل اے کا کہنا ہے کہ انہوں نے ہیمنت سورین کی ذات پر کوئی تبصرہ نہیں کیا، جے ایم ایم اس ایف آئی آر کا سیاسی استعمال کرنا چاہتی ہے۔
