علیگڑھ میں معمولی تکرار پر مسلم طالب علم کا قتل

علی گڑھ: ریاست اتر پردیش میں علی گڑھ مسلم یونیورسٹی اے بی کے یونین اسکول کے قریب دن دہاڑے 11 ویں جماعت کے طالب علم کو قتل کر دیا گیا۔ میڈیا رپورٹ کے مطابق علی گڑھ مسلم یونیورسٹی کے پروکٹر محمد وسیم علی نے بتایا کہ سی سی ٹی وی فوٹیج میں انکشاف ہوا ہے کہ سینئر سیکنڈری اسکول میں 11 ویں جماعت کے طالب علم محمد کیف اپنے اسکوٹر پر دیگر تین افراد کے ساتھ بیٹھے ہوئے تھے اور اسی دوران مسلح افراد وہاں پہنچ گئے۔ مسلح افراد اور مقتول کے درمیان معمولی تلخ کلامی ہوئی اور اس دوران ان میں سے ایک شخص نے محمد کیف پر فائرنگ کی۔محمد وسیم علی نے کہا کہ محمد کیف پر فائرنگ کے ساتھ ساتھ تیز دھار ہتھیار سے بھی حملہ کیا گیا۔رپورٹ کے مطابق عینی شاہدین نے بتا یا کہ حملہ آور جائے وقوع سے فرار ہوگئے جبکہ یونیورسٹی کی سیکیورٹی اور پولیس بعد میں وہاں پہنچی۔محمد کیف کو زخمی حالت میں جواہر لعل نہر میڈیکل کالج ہاسپٹل منتقل کیا گیا جہاں ڈاکٹروں نے ان کی موت کی تصدیق کردی ۔سیول لائنز سرکل افسر ابھے پانڈے نے کہا کہ پولیس مقتول کے اہل خانہ کی جانب سے درج کی گئی شکایت کی بنیاد پر مقدمہ درج کرنے کا عمل مکمل کر رہی ہے۔