ئی دہلی: تلنگانہ کانگریس کے ورکنگ صدر اور ہندوستانی کرکٹ ٹیم کے سابق کپتان محمد اظہر الدین ان دنوں فل فارم میں نظر آرہے۔ انہوں نے کانگریس کے راجیہ سبھا رکن عمران پرتاپ گڑھی سے دہلی میں ان کی سرکاری رہائش گاہ پر ملاقات کی۔ اس میٹنگ میں محمد اظہرالدین نے عمران پرتاپ گڑھی کو خاص طور پر اس بات کے لیے مبارکباد دی کہ جب سے وہ کانگریس اقلیتی شعبہ کے چیئرمین بنے ہیں، کانگریس اقلیتی شعبہ کو ہر محاذ پر کانگریس پارٹی کے ساتھ مضبوطی کے ساتھ کھڑا دیکھا گیا ہے اور اقلیتوں کے محکمے کی تنظیم سازی کی جارہی ہے۔ ساتھ ہی اقلیتی محکمہ کی تنظیم بھی پورے ملک میں پہلے سے کئی گنا زیادہ مضبوط ہو چکی ہے۔ذرائع کے حوالے سے خبر کے مطابق محمد اظہرالدین نے عمران پرتاپ گڑھی کو جلد تلنگانہ کا دورہ کرنے کی دعوت دی اور تلنگانہ اسمبلی انتخابات میں مہم چلانے کی بھی درخواست کی۔ کانگریس اس مرتبہ کسی بھی حال میں حیدرآباد میں اسدالدین اویسی کا قلعہ منہدم کرنا چاہتی ہے۔ اظہرالدین نے بتایا کہ موجودہ بی آر ایس کے دور حکومت میں عام آدمی پریشان ہے اور اس حکومت کی کارکردگی سے عوام سخت ناراض ہے۔ اظہرالدین نے کہا کہ آپ کے اسمبلی انتخابات میں تشہیر سے کانگریس پارٹی کو ہر سطح پر مدد ملے گی، اظہر نے کہا کہ اس الیکشن میں کانگریس پارٹی حکومت بنائے گی۔
سابق ایم پی محمد اظہر الدین نے کانگریس لیڈر عمران پرتاپ گڑھی کے ساتھ بات چیت کے دوران کہا کہ جس طرح کانگریس نے ہماچل پردیش اور کرناٹک میں کامیابی حاصل کی ہے۔ اور جس طرح فتح کا جھنڈا لہرایا ہے اسی طرح تلنگانہ میں کانگریس کی بمپر جیت کے ساتھ حکومت بنے گی۔
