بہار میں 2025کے اسمبلی انتخابات میں ’جن سوراج‘ ای بی سی کی حمایت کریگا

پٹنہ۔ سیاسی حکمت عملی کار سے سرگرم سیاست داں بننے والے پرشانت کشور نے کہاکہ ان کی تنظیم ’جن سوراج‘ بہار کے 2025اسمبلی انتخابات میں انتہائی پسماندہ طبقات (ای بی سی) کے زمرے سے تعلق رکھنے والے کم ازکم 75امیدواروں کو پلیٹ فارم سے میدان میں اتار کر ان کی حمایت کریگا۔کشور کا دعوی ہے کہ ای بی سی کمیونٹی سے تعلق رکھنے والے لوگوں کا ریاست میں برسراقتدار پارٹیوں نے ہمیشہ استحصال کیاہے۔سماجی لیڈر کرپوری ٹھاکر کی 24جنوری کو منائی جانی والے یوم پیدائش کے پیش نظر منعقدہ ایک تقریب سے خطاب کرتے ہوئے انہوں نے کہاکہ ”بہار میں 2025میں اسمبلی انتخابات ہیں‘ آپ دیکھیں گے ای بی سی زمرے سے کم ازکم 25امیدوار ایک پلیٹ فارم سے پہلی مرتبہ مقابلہ کریں گے“۔انہوں نے کہاکہ ”ہم اپنی طاقت ان کے پیچھے لگائیں گے۔
ریاستی کمیٹی سے تعلق رکھنے والے لوگوں کا برسراقتدار پارٹیوں نے ہمیشہ استحصال کیاہے۔بہار میں سیاسی جماعتوں نے ان کی ترقی او ربہتری کے لئے کبھی نہیں سونچا“۔کشور نے 2022میں شروع کی گئی جن سوراج مہم کو سیاسی جماعت میں تبدیل کرنے کے اعلان کو روک دیاہے۔کشور نے یہ بھی کہاکہ ’جن سوراج‘ اس کمیونٹی سے تعلق رکھنے والے اسٹوڈنٹس کو مسابقتی امتحانات کے لئے معاشی مدد بھی کریگا۔واضح ہو کہ بہار میں نتیش کمار کی حکومت کی جانب سے کرائے گئے ذات پات کے سروے کی رپورٹ کے مطابق 13.07کروڑ کی آبادی میں بہار میں 63فیصد لوگ دیگر پسماندہ طبقات(او بی سی) اور انتہائی پسماندہ طبقات(ای بی سی)زمرے میں ہیں۔