جموں: جموں وکشمیر کے پونچھ ضلع کے سرحدی علاقے بالا کوٹ سیکٹر میں سیکورٹی فورسز نے بڑے پیمانے پر ملی ٹینٹ مخالف آپریشن شروع کیا ہے۔ ذرائع نے بتایا کہ بالا کوٹ سیکٹر کے دھابی دھرتی اور اس کے ملحقہ علاقوں میں سیکورٹی فورسز نے اتوار کی صبح تلاشی آپریشن شروع کیا اور ایک وسیع العریض جنگلی علاقے میں پہرے بٹھا دیئے گئے ہیں۔
ذرائع کے مطابق مشتبہ افراد کی نقل وحرکت کی اطلاع ملنے کے بعد سیکورٹی فورسز نے تلاشی آپریشن شروع کیا ہے۔ ذرائع نے بتایا کہ پچھلے کچھ دنوں سے لائن آف کنٹرول پر دراندازی کے واقعات میں غیر معمولی اضافہ دیکھنے کو ملا ہے جس کے پیش نظر پاکستان کے ساتھ لگنے والی سرحدوں پر سیکورٹی فورسز کی چوکسی بڑھائی گئی۔ ذرائع نے بتایا کہ اتوار کے روز پونچھ کے کئی سرحدی علاقوں کو سیکورٹی فورسز نے محاصرے میں لے کر فرار ہونے کے راستوں کو سیل کیا۔
ذرائع کے مطابق فوج نے مصدقہ اطلاع ملنے کے بعد کئی سرحدی علاقوں میں فورسز کی تعیناتی عمل میں لائی گئی ہے تاکہ امکانی دراندازی کو ناکام بنایا جاسکے۔ معلوم ہوا ہے کہ اضافی اہلکاروں کو سرحدی علاقے کی طرف روانہ کیا گیا ہے اور بڑے پیمانے پر تلاشی آپریشن شروع کیا گیا ہے۔ آخری اطلاعات موصول ہونے تک سرحدی علاقے میں تلاشی آپریشن جاری تھا۔ اس سلسلے میں مزید تفصیلات کا انتطار ہے۔
