دیوبند میں بھیم آرمی چیف اور آزاد سماج پارٹی کے قومی صدر چندرشیکھر پر حملہ واقعہ میں پولیس نے کچھ لوگوں کو حراست میں لیا ہے جن سے پوچھ تاچھ کی جا رہی ہے۔ ایسی بھی خبریں سامنے آ رہی ہیں کہ حملے میں شامل کار کو بھی پولیس نے برآمد کر لیا ہے۔ حالانکہ اس سلسلے میں پولیس کا ابھی تک کوئی بیان سامنے نہیں آیا ہے۔ اس درمیان زخمی چندرشیکھر آزاد کی عیادت کرنے کے لیے اسپتال میں اہم شخصیات کے پہنچنے کا سلسلہ جاری ہے۔
جمعرات کی دوپہر پہلوان بجرنگ پونیا نے چندرشیکھر آزاد سے اسپتال پہنچ کر ملاقات کی اور ان سے خیریت دریافت کی۔ چندرشیکھر پر حملے کو لے کر میڈیا اہلکاروں سے بات چیت کرتے ہوئے بجرنگ پونیا نے کہا کہ ’’حملہ قابل مذمت ہے اور ملزمین کو جلد از جلد گرفتار کر ان کے خلاف کارروائی کی جانی چاہیے۔‘‘ بجرنگ پونیا کے اسپتال پہنچنے کے کچھ ہی دیر بعد ساکشی ملک بھی ضلع اسپتال پہنچیں۔ حالانکہ انھوں نے میڈیا اہلکاروں سے کوئی بات چیت نہیں کی۔ وہ سیدھے آئی سی یو میں گئیں اور چندرشیکھر کا حال چال جانا۔
میڈیا رپورٹس کے مطابق مختلف پارٹیوں سے تعلق رکھنے والے لیڈران چندرشیکھر آزاد کی خیریت دریافت کرنے اسپتال پہنچ رہے ہیں۔ ضلع اسپتال میں داخل چندرشیکھر آزاد سے ملنے کے لیے بی جے پی کے میئر ڈاکٹر اجئے کمار، رکن اسمبلی راجیو گمبر، سابق رکن پارلیمنٹ راگھو لکھن پال شرما، ٹریزرار نریش سمیت دیگر عہدیدار بھی پہنچے۔ ان سبھی نے ملاقات کے بعد میڈیا سے کہا کہ حکومت اس حملہ کو لے کر سنجیدہ ہے اور ملزم کسی بھی صورت میں پولیس سے نہیں بچ پائیں گے۔
