سکم اسمبلی انتخاب میں سکم کرانتی کاری مورچہ کی عظیم الشان کامیابی

گنگٹوک :سکم اسمبلی انتخابات کے ووٹوں کی گنتی میں سکم کرانتی کاری مورچہ (ایس کے ایم)ایس کے ایم نے 32 اسمبلی سیٹوں میں سے 31 پر کامیابی حاصل کی ہے۔ سکم میں حکمراں پارٹی سکم کرانتی کاری مورچہ (ایس کے ایم) کی یہ مسلسل دوسری اور زبردست جیت ہے۔ ایک سیٹ ایس ڈی ایف (سکم ڈیموکریٹک فرنٹ) کو بھی ملی ہے جبکہ کسی دوسری پارٹی کو ایک بھی سیٹ نہیں ملی۔ایس کے ایم اور ایس ڈی ایف نے تمام 32 اسمبلی سیٹوں پر امیدوار کھڑے کیے تھے جبکہ بی جے پی (31)، سی اے پی-سکم (30) اور کانگریس (12) سیٹوں پر اپنی قسمت آزما رہی تھی۔ گزشتہ اسمبلی انتخابات میں ایس کے ایم کے ساتھ بی جے پی کا اتحاد تھا، لیکن اس بار بی جے پی نے علاحدہ الیکشن لڑنے کا فیصلہ کیا تھا۔ ایس کے ایم کے سربراہ پریم سنگھ تمانگ نے ایس کے ایم کی جیت پر خوشی کا اظہار کیا ہے۔ انہوں نے کہا کہ ایس ڈی ایف لیڈر پون کمار چاملنگ 2019 میں مکمل طور پر ہار گئے، لیکن یہ جمہوریت ہے۔ جو کام وہ 25 سال میں نہیں کر سکے وہ ہم نے پانچ سالوں میں کر دکھایا۔ عوام نے اسی بنیاد پر ہمیں ووٹ دیا ہے۔ایس کے ایم کے صدر پریم سنگھ تمانگ نے 24 سال سے زیادہ اقتدار میں رہنے کے بعد ریاست میں 17 سیٹیں حاصل کرکے 24 سال سے زائد سالوں تک اقتدار میں رہنے کے بعد چاملنگ حکومت کو اقتدار سے بے دخل کر دیا تھا۔
واضح رہے کہ اپوزیشن ایس ڈی ایف کے سربراہ پون کمار چاملنگ، جو ریاست کے پانچ بار وزیر اعلیٰ رہے، دونوں سیٹوں سے ہار گئے ہیں۔ نمچی بنگ اسمبلی سیٹ پر، ایس کے ایم کے راجو بسنت نے انہیں 2,256 ووٹوں سے شکست دی۔ بسنت کو 7,195 اور چاملنگ کو 4,939 ووٹ ملے۔ پوکلوک-کامرانگ سیٹ پر ایس کے ایم کے بھوج راج رائے نے انہیں 3,063 ووٹوں سے شکست دی۔ رائے کو 8,037 اور چاملنگ کو 4,974 ووٹ ملے۔ سکم میں 19 اپریل کو ووٹنگ ہوئی تھی۔ ووٹوں کی گنتی آج صبح 6 بجے شروع ہوئی۔