حکومت کی سطح پر غور کے بعد حجاب پرقطعی فیصلہ۔سدارمیا

میسور: حجاب پر پابندی ہٹانے کے اعلان کے ایک دن بعد چیف منسٹر کرناٹک سدارامیا نے آج اپنے بیان پر یو ٹرن لے لیا اور یہ کہا کہ اس سلسلے میں ابھی تک کوئی فیصلہ نہیں کیا گیا ہے۔حجاب پر پابندی ہٹانے کے اپنے اعلان کے تناظر میں میڈیا کے سوالات پر ردعمل ظاہر کرتے ہوئے کل ضلع کے ننجن گڈ تعلقہ میں کاوالنڈے کے دورے کے دوران میڈیا کے نمائندوں سے بات کرتے ہوئے چیف منسٹر سدارامیا نے کہا کہ ہم نے ابھی تک پابندی کو منسوخ نہیں کیا ہے لیکن میں پابندی کے بارے میں ایک رپورٹر کے اٹھائے گئے سوال کے بعد اسی طرح کے خطوط پر جواب دیا۔ ہم پابندی ہٹانے کے بارے میں سوچ رہے ہیں لیکن حتمی فیصلہ لینے سے پہلے حکومتی سطح پر اس پر بات کریں گے۔ٰ سدارامیا نے یو ٹرن لیتے ہوئے کہا ہے کہ اس معاملے پر ابھی غور کیا جا رہا ہے۔ انہوں نے کہا کہ انہوں نے ڈریس کوڈ والے تعلیمی اداروں میں مذہبی لباس پر پابندی کے حکومتی حکم نامے کو ہٹانے کی بات کی ہے۔ انہوں نے زور دے کر کہا کہ حکومت کے حکم کو جلد ہی منسوخ کر دیا جائے گا۔میڈیا سے بات کرتے ہوئے کرناٹک کے چیف منسٹر نے کہا کہ حجاب پر سے پابندی ابھی تک نہیں ہٹائی گئی ہے۔ مجھ سے حجاب پر پابندی کے بارے میں سوال کیا گیا تو انہوں نے بتایا کہ حکومت اسے ہٹانے پر غور کررہی ہے۔ ہم اس کے بارے میں بات کریں گے۔کل سدارامیا کے حجاب پر پابندی ہٹانے کے اعلان کے بعد بی جے پی کی جانب سے شدید ردعمل کا اظہار کیا گیا۔مسلم تنظیموں اور قائدین نے اس کا خیرمقدم کیا تھا ۔