اتر پردیش میں ووٹر لسٹ کی جامع خصوصی نظر ثانی (ایس آئی آر) کے دوران سائبر مجرم بھی سرگرم ہو گئے ہیں، جس پر ریاست کے چیف الیکٹورل آفیسر نودیپ رِنوا نے لوگوں کو خبردار کیا ہے۔ انہوں نے ووٹروں کو اوٹی ٹی پی فراڈ سے ہوشیار رہنے کی وارننگ دی ہے۔ چیف الیکٹورل آفیسر نے ووٹروں کو ایس آئی آر عمل کے دوران چوکس رہنے کا مشورہ دیا۔ انہوں نے کہا کہ بی ایل او ووٹر لسٹ تصدیق کے عمل کے دوران کسی بھی مرحلے پر ووٹروں سے او ٹی پی نہیں لیا جاتا۔
چیف الیکٹورل آفیسر نے بتایا کہ ایس آئی آر کے عمل کے دوران تمام بی ایل او گھر گھر جا کر ووٹروں کو گنتی فارم تقسیم کر رہے ہیں اور انہیں بھروا رہے ہیں۔ اس عمل میں او ٹی پی کی ضرورت نہیں ہے۔ انہوں نے ووٹروں کے لیے الرٹ جاری کرتے ہوئے کہا کہ کچھ شرپسند عناصر بی ایل او بن کر لوگوں سے موبائل پر او ٹی پی مانگ رہے ہیں، ایسے لوگ فرضی اور مشکوک ہیں۔
الیکشن کمیشن نے ایسے معاملات کو سائبر فراڈ قرار دیتے ہوئے لوگوں سے ان افواہوں سے محتاط رہنے کی اپیل کی ہے اور کہا ہے کہ اگر کوئی آپ سے فون کر کے، میسیج کے ذریعے یا دیگر کسی طرح سے ایس آئی آر کے لیے او ٹی مانگتا ہے تو ووٹر کو کسی بھی حالت میں ان کے ساتھ او ٹی پی شیئر نہ کریں۔
الیکشن کمیشن نے کہا کہ ایسے افراد ووٹروں کو دھوکہ دے سکتے ہیں۔ ان واقعات سے بچنے کے لیے الیکشن کمیشن نے لوگوں پر زور دیا کہ وہ اپنے بی ایل اوز سے رابطہ کریں۔ الیکشن کمیشن نے یہ بھی کہا کہ ووٹر خود گنتی کا فارم پُر کر کے بی ایل او کے پاس جمع کرا سکتے ہیں۔ نودیپ رِنوا نے تمام ضلعی الیکشن افسروں کو ہدایت دی ہے کہ وہ ایس آئی آر سے متعلق افواہوں کو روکنے کے لیے بیداری مہم شروع کریں، تاکہ لوگ چوکس رہیں اور ایس آئی آر کے عمل میں کسی قسم کی بے ضابطگی نہ ہو سکے۔
