گائے کی اسمگلنگ کاشبہ : ہجومی تشدد میں دو افراد جاں بحق

حیدرآباد:چھتیس گڑھ میں رائے پور ضلع کے قریب گائے کی اسمگلنگ کے شبہ میں ہجومی تشدد میں دو افراد مبینہ طور پر ہلاک ہوگئے جب کہ ایک اور شخص زخمی ہوگیا۔ ہندستان ٹائمز نے پولیس کے حوالہ سے بتایا کہ یہ واقع جمعرات کی شب تقریباً2:20 بجے ارنگ پولیس اسٹیشن علاقہ کے تحت مہاندی دریا کے برج پر پیش آیا۔دونوں مہلوکین کی شناخت چاند میاں اور گڈو خان کی حیثیت سے کی گئی۔
زخمی کی شناخت صدام کے طور پر کی گئی جو ہسپتال میں زیر علاج ہے۔ پولیس نے کہا کہ ان تینوں کا تعلق اترپردیش کے سہارن پور ضلع سے ہے۔ پولیس نے کہا کہ معاملہ کی جانچ کی جارہی ہے چونکہ ہنوز یہ توثیق نہیں ہوپائی کہ آیا وہ پل سے نیچے کودگئے تھے یا انہیں زدو کوب کیا گیا۔ارنگ پولیس اسٹیشن کے انچارج شیلیندر سنگھ شیام نے کہا کہ مہلوکین مہاسمند میں ایک موضع سے بھینسوں کو اڈیشہ کی مارکٹ میں لے جارہے تھے۔ پولیس عہدیدار نے کہا کہ تینوں اپنی راہ پر تھے کہ ان پر شبہ کرتے ہوئے ان کا تعاقب کیا گیا جس پر انہوں نے اپنی گاڑی کو رائے پور کی سمت موڑ دیا۔ہمیں شبہ ہے کہ حملہ آوروں نے یہ منصوبہ بنایا تھا چونکہ انہوں نے تیز دھار کیلے پھینکے تھے جس سے چوپائے لے جانے والی گاڑی کا ٹائر پل پرپنکچر ہوگیا جس کی وجہ سے گاڑی کو مجبوراً روکنا پڑااور دونوں فریقین میں تصادم ہوگیا۔