ترنمول کانگریس کو ’خیر سگالی ریلی‘ نکالنےکی کولکتہ ہائی کورٹ سے اجازت

کولکتہ:کلکتہ ہائی کورٹ نے جمعرات کو برسراقتدار ترنمول کانگریس کے ذریعہ 22 جنوری کو طے ’خیر سگالی ریلی‘ کو مشروط اجازت دے دی ہے۔۔ بی جے پی نے عدالت میں عرضی داخل کریہ کوشش کی تھی کہ ممتا بنرجی کی ’خیر سگالی ریلی‘ 22 جنوری کو نہ نکلے، لیکن انھیں اس کوشش میں ناکامی ہاتھ لگی۔کلکتہ ہائی کورٹ سے منظوری ملنے کے بعد ترنمول کانگریس نے اپنے لیڈران کو ہدایت دی ہے کہ وہ ’خیر سگالی ریلی‘ میں مذہبی قائدین کی شرکت یقینی بنائیں۔ کولکاتا میں ریلی کی قیادت وزیر اعلیٰ ممتا بنرجی کریں گی جو جنوبی کولکاتا میں ہزارا کراسنگ سے شروع ہونے والی ہے اور وسطی کولکاتا میں پارک سرکس سیون-پوائنٹ کراسنگ پر ختم ہونے والی ہے۔
واضح رہے کہ مغربی بنگال میں حزب مخالف لیڈر نے بدھ کے روز کلکتہ ہائی کورٹ میں ایک عرضی دخل کر اس بنیاد پر ممتا کی ریلی کو ملتوی کرنے میں عدالت کی مداخلت کا مطالبہ کیا تھا کہ اس سے ریاست میں نظامِ قانون کا مسئلہ پیدا ہو سکتا ہے۔ حالانکہ کلکتہ ہائی کورٹ نے ریلی کے انعقاد کے لیے کچھ شرطیں لگاتے ہوئے اپوزیشن لیڈر کی عرضی خارج کر دی۔ ریلی کے لیے پہلی شرط یہ ہے کہ اس دوران کوئی ایسا نعرہ یا بیان نہ دیا جائے جس سے کسی کے مذہبی جذبات مجروح ہوں۔ ساتھ ہی کلکتہ ہائی کورٹ نے انتظامیہ کے ساتھ ساتھ ریلی منعقد کرنے والوں کو بھی ہدایت دی ہے کہ مجوزہ خیر سگالی ریلی سے عام ٹریفک رخنہ انداز نہ ہو، خصوصاً ایمبولنس کی آمد و رفت متاثر نہ ہو۔
کلکتہ ہائی کورٹ نے 22 جنوری کو پوری ریاست میں سنٹرل آرمڈ فورسز کے جوانوں کی تعیناتی کے مطالبہ پر مبنی اپوزیشن لیڈر کی عرضی کو بھی خارج کر دیا۔ حالانکہ ریاست کے داخلہ سکریٹری اور ریاستی ڈائریکٹر جنرل آف پولیس کو یہ یقینی کرنے کے لیے پیش قدمی کی ہدایت دی ہے کہ اس دن مغربی بنگال میں نظامِ قانون کی حالت خراب نہ ہو۔ ریاست کے سبھی ضلعوں میں اسی طرح کی ’خیر سگالی ریلی‘ منعقد کرنے کے برسراقتدار طبقہ کی تجویز پر کلکتہ ہائی کورٹ نے سبھی ضلع مجسٹریٹس اور ضلع پولیس سپرنٹنڈنٹ کو یہ جانچ کرنے کی ہدایت دی ہے کہ کیا ایسی ضلع سطحی ریلیاں منعقد کرنے کے لیے مقامی انتظامیہ سے ضروری اجازت طلب کی گئی تھی۔ کلکتہ ہائی کورٹ نے یہ بھی کہا ہے کہ اگر پروگرام کے دوران کوئی ناخوشگوار واقعہ ہوتا ہے تو ریلی کرنے والے ذمہ دار ہوں گے۔