سہارنپور :اتر پردیش کے سہارنپور میں دل دہلا دینے والا واقعہ پیش آیا ہے۔ یہاں ایک شخص نے اپنی بیوی اور تین بچوں کو بے رحمی سے گولی مار دی۔ اس دردناک حادثے میں تینوں بچوں کی موت ہو گئی جبکہ خاتون کو ضلع اسپتال میں داخل کرایا گیا اس کے بعد اسے ہائر سنٹر ریفر کر دیا گیا، جہاں اس کی حالت نازک بنی ہوئی ہے۔ اس حادثہ کی خبر سن کر ہر کوئی حیران و پریشان ہے۔
سہارنپور کے گاؤں سانگا ٹھیڈا میں بی جے پی کے ضلع یووا مورچہ کے سابق نائب صدر اور حال میں ضلع ایگزیکٹیو کے رکن یوگیش روہلا نے اپنے لائسنسی ریوالور سے اپنی اہلیہ نیہا (عمر 40 سال)، بیٹی شردھا (11)، بیٹا دیوانش (6) اور شیوانش (5) کو گولی مار دی۔ گولی لگنے کے بعد شردھا کی موقع پر ہی موت ہو گئی۔
واقعہ کی اطلاع ملتے ہی موقع پر پہنچی پولیس نے دونوں زخمی بیٹوں اور خاتون کو علاج کے لیے ضلع اسپتال میں بھجوایا۔ اسپتال میں علاج کے دوران شیوانش اور دیوانش کی موت ہو گئی جبکہ ان دونوں کی ماں نیہا کی حالت نازک بتائی جا رہی ہے۔ جائے حادثہ پر پر سینئر ایس پی روہت سنگھ سجوان، ایس پی دیہات ساگر جین بھی موجود تھے۔ پولیس نے یوگیش روہلا کو گرفتار کر لیا ہے۔
واقعہ کے بارے میں ایس ایس پی سہارنپور نے بتایا کہ ایک شخص کے ذریعہ فون پر اطلاع دی گئی تھی کہ اس نے اپنی بیوی اور بچوں کو گولی مار دی ہے۔ وہ اپنی بیوی کے کردار کو لے کر شبہ میں تھا۔ اس لیے اس نے چاروں کو گولی مار دی۔
