ملک کے مفاد میں تمام اپوزیشن پارٹیاں متحد ہوجائیں۔نتیش

نئی دہلی :انڈیا اتحاد کے تعلق سے بہار کے وزیر اعلیٰ نتیش کمار کا ایک اہم بیان سامنے آیا ہے۔ انھوں نے کہا ہے کہ ’’سب متحد ہو جائیں، اور مجھے کچھ نہیں چاہیے۔انھوں نے کہا ہے کہ ’’مجھے کچھ نہیں چاہیے۔ ریاست کے مفاد میں بس اتنا چاہتا ہوں کہ سبھی اپوزیشن پارٹیاں متحد ہو کر انتخاب لڑیں۔‘‘ انھوں نے مزید کہا کہ ’’خبریں شائع ہو رہی تھیں کہ ہم میٹنگ میں نہیں جا رہے ہیں، ہماری طبیعت خراب تھی۔ اگلی میٹنگ ہوگی تو ہم کہیں گے کہ آگے کی سبھی چیزیں طے کر لیجیے۔ میں نے شروع سے کہا ہے کہ یہ ملک کے مفاد میں ہے۔ میری باتیں اٹھتی ہیں تو میں صاف کرنا چاہتا ہوں کہ مجھے کچھ نہیں چاہیے، میں نے (عوام کی) کافی خدمت کی ہے۔
واضح رہے کہ اس سے قبل آر جے ڈی صدر لالو پرساد نے ایک بیان میں کہا تھا کہ آئندہ سال ہونے والے اسمبلی انتخاب کی پالیسی تیار کرنے کے لیے اپوزیشن اتحاد انڈیا کے لیڈران 17 دسمبر کو میٹنگ کریں گے۔ یہ بیان لالو پرساد نے 5 دسمبر کو دیا تھا۔ پہلے میٹنگ 6 دسمبر کو ہونے کی بات سامنے آئی تھی، لیکن کئی اہم لیڈران مختلف وجوہات سے میٹنگ میں شامل نہیں ہو پا رہے تھے۔ نتیجہ کار میٹنگ ملتوی کرنی پڑی۔ اب امید ظاہر کی جا رہی ہے کہ 17 دسمبر کو ہونے والی میٹنگ میں ممتا بنرجی، نتیش کمار، اکھلیش یادو سمیت سبھی سرکردہ لیڈران کی شرکت ہوگی۔