تلنگانہ اسمبلی انتخابات کے لیےاے آئی ایم آئی ایم کی جانب سے 6امیدواروں کا اعلان

حیدرآباد: آل انڈیا مجلس اتحاد المسلمین (اے آئی ایم آئی ایم) نے تلنگانہ اسمبلی انتخابات کے لیے بالآخر اپنے امیدواروں کا اعلان کر دیا ہے۔ مجلس کے صدر بیرسٹر اسدالدین اویسی نے جمعہ کو پارٹی ہیڈکوارٹر دارالسلام میں ایک پریس کانفرنس سے خطاب کرتے ہوئے 6 اسمبلی حلقوں سے مجلسی امیدواروں کا اعلان کیا۔اسدالدین اویسی کے مطابق حلقہ چندرائن گٹہ سے اکبرالدین اویسی، ملک پیٹ سے احمد بن عبداللہ بلعلہ، کاروان سے کوثر محی الدین، نامپلی سے ماجد حسین، یاقوت پورہ سے جعفر حسین معراج اور حلقہ چار مینار سے ذوالفقار علی مجلس کے امیدوار ہوں گے۔ اس مرتبہ دو ارکان اسمبلی کو موقع نہیں دیا گیا۔ حلقہ چار مینار سے ممتاز احمد خان کے بجائے حیدرآباد کے سابق میئر میر ذوالفقار علی کو میدان میں اتارا گیا۔اسی طرح حلقہ یاقوت پورہ سے احمد پاشاہ قادری کے بجائے سابق میئر ماجد حسین کو ٹکٹ دیا گیا۔
پریس کانفرنس سے خطاب کرتے ہوئے اسدالدین اویسی نے کہا کہ بہت جلد دیگر تین حلقوں پر پارٹی امیدواروں کا اعلان کیا جائے گا۔ انہوں نے کہا کہ پارٹی کی جانب سے انتخابات میں 9 حلقوں پر مقابلہ کیا جائے گا۔ انہوں نے کہا کہ جوبلی ہلز، بہادر پورہ اور راجندر نگر سے مجلسی امیدواروں کا اعلان کیا جائے گا۔ اسدالدین اویسی نے مجلس میں مخالفت سے متعلق تمام افواہوں کو گمراہ کن قرار دیتے ہوئے کہا کہ پارٹی میں سب خوش ہیں۔واضح رہے کہ تلنگانہ اسمبلی انتخابات کے لئے آج اعلامیہ جاری کر دیا گیا۔ اس کے ساتھ ہی پرچہ نامزدگی داخل کرنے کے عمل کا آغاز ہوگیا۔ پرچہ نامزدگیاں 10 نومبر تک قبول کی جائیں گی۔