بہار کے 7لوگوں کی موت ،10لاپتہ،36زخمی

پٹنہ (ت ن س)اڈیشہ کے بالاسورمیں ہوئے بھیانک ٹرین حادثے میں بہارکے 7مسافروں کی موت ہوگئی ہے اور 36 زخمی ہوگئے ہیں۔ کئی مسافر پھنسے ہوئے ہیں۔ ذرائع کے مطابق اس حادثہ میں شمالی بہار کے 4، نوادہ 1،جموئی کے2لوگوں کی موت ہوگئی ہے۔ 10لوگ اب بھی لاپتہ بتائے جاتے ہیں۔ مہلوکین میں 2مدھوبنی کے جھنجھارپور اور ایک لدنیاکے مسافرہیں۔ مشرقی چمپارن کے رام گڑھواکے بھی ایک مسافرکی موت ہوئی ہے۔جموئی کے بھی 2لوگوں کی موت ہوئی ہیں۔ شمالی بہارکے 20لوگ زخمی ہوئے ہیں جن میں 9لوگ مدھوبنی کے، 11لوگ مشرقی چمپارن کے ہیں۔ ریاستی حکومت حادثہ میں پھنسے لوگوں کو بہار لانے کیلئے کام کررہی ہے اور انہیں بس سے لایاجارہاہے۔ادھروزیر اعلیٰ نتیش کمار کی ہدایت پر، اڈیشہ کے بالاسور میں بہناگا ریلوے اسٹیشن کے قریب ہوئے ہولناک ٹرین حادثے میں بہار کے مسافروں کو ضروری مدد فراہم کرنے کے لیے ریاست کے حکام کی ایک ٹیم بھیجی جا رہی ہے۔جو اڑیشہ حکومت، ریلوے اور بالاسور ضلع انتظامیہ کے ساتھ رابطہ قائم کرے گی۔وزیر اعلیٰ کی ہدایات پر سینئر افسران کی ایک چار رکنی ٹیم تشکیل دی گئی ہے۔جس میں انڈین ایڈمنسٹریٹو سروس کے افسر اور لیبر ریسورس ڈیپارٹمنٹ کے ڈائریکٹر مسٹر شیام بہاری مینا، مظفر پور کے ریلوے ایس پی ڈاکٹر کمار آشیش، افسر ڈیزاسٹر مینجمنٹ ڈیپارٹمنٹ کے او ایس ڈی مسٹر اویناش کمار اور ایس ڈی آر ایف کے ڈپٹی کمانڈنٹ مسٹر شہریار شامل ہیں۔ ڈیزاسٹر مینجمنٹ ڈیپارٹمنٹ کے سکریٹری سنجے کمار اگروال اس کی نگرانی کر رہے ہیں۔ اس حادثے سے متعلق ضروری معلومات جمع کرنے کے لیے ڈیزاسٹر مینجمنٹ ڈیپارٹمنٹ کی طرف سے ہیلپ لائن نمبر- 7070290170 اور205/ 0612-2294204جاری کیے گئے ہیں۔بہار حکومت نے اس ٹرین حادثے میں بچ جانے والے ریاست بہار کے مسافروں کو واپس لانے کا عمل شروع کر دیا ہے۔ اس سلسلے میں پہلی کھیپ میں ریاست کے 40 مسافروں کو بس کے ذریعے بہار واپس لایا جا رہا ہے۔ جس میں ارریہ کے 24 ،کشن گنج اور سیتامڑھی کے 2-2، دربھنگہ 9 اور سمستی پور کے 3 مسافر شامل ہیں۔ وزیر اعلیٰ نتیش کمار نے اڈیشہ کے بالاسور میں بہناگا ریلوے اسٹیشن کے قریب ہولناک ٹرین حادثے میں 200 سے زیادہ لوگوں کی موت کو انتہائی افسوسناک قرار دیا ہے۔ وزیر اعلیٰ اس واقعہ سے سوگوار ہیں۔ وزیراعلیٰ نے اس حادثے میں ہلاک ہونے والے افراد کے اہل خانہ سے دلی تعزیت کا اظہار کرتے ہوئے غم کی اس گھڑی میں مہلوکین کے لواحقین کے لئے صبر جمیل کی دعا کی ہے۔ وزیراعلیٰ نے حادثے میں زخمی ہونے والوں کی جلد صحت یابی کے لیے بھی خدا سے دعا کی۔