گڑھ چرولی : مہاراشٹر کے گڑھ چرولی ضلع میں گزشتہ تین دن اور تین رات جاری رہنے والی شدید مڈبھیڑ کے بعد سیکورٹی فورسز نے 71 لاکھ روپے کے مجموعی انعامی 7 نکسلیوں کو ہلاک کر دیا ہے ۔ اس کارروائی کی تصدیق ضلع پولیس سپرنٹنڈنٹ نیلوتپل نے کی۔ہفتہ کو گڑھچرولی میں منعقدہ پریس کانفرنس سے خطاب کرتے ہوئے پولیس سپرنٹنڈنٹ نیلوتپل نے کہا کہ ضلع میں اب صرف 7 مسلح نکسلی باقی رہ گئے ہیں اور 31 مارچ تک گڑھچرولی سے نکسل واد کا مکمل خاتمہ کر دیا جائے گا۔ انہوں نے بتایا کہ اس مڈبھیڑ کے دوران پولیس جوانوں نے بے مثال جرأت کا مظاہرہ کیا، تاہم اس کارروائی میں دیپک مڈاوی نامی ایک جوان آنجھانی ہو گیا، جبکہ ایک اور جوان زخمی ہوا ہے ، جس کی حالت خطرے سے باہر بتائی گئی ہے ۔ مہلوک 7 نکسلیوں کی شناخت ہو چکی ہے ، جن میں دو بڑے کیڈر شامل ہیں۔
اڈیشہ میں نکسل مخالف مہم کو بڑی کامیابی ملی ہے ۔ رائے گڑا ڈسٹرکٹ پولیس آفس (ڈی پی او) میں منعقدہ خصوصی تقریب میں 15 کٹر ماؤنوازوں نے ایڈیشنل ڈائریکٹر جنرل آف پولیس (اینٹی نکسل آپریشنز) سنجیب پانڈا کے سامنے باضابطہ طور پر ہتھیار ڈال دیے ۔ ان تمام پر مجموعی طور پر 1.98 کروڑ روپے کا انعام تھا۔ ہتھیار ڈالنے والے ماؤنوازوں نے رضاکارانہ طور پر اسلحہ پھینکتے ہوئے اے ڈی جی پانڈا کے حوالے کیا، جو تشدد کا راستہ چھوڑ کر مرکزی دھارے میں شامل ہونے کے ان کے فیصلے کی علامت ہے ۔
