پنچکولہ: ہریانہ میں پنجور ٹپرا بائی پاس پر اتوار کی صبح قریب 5 بجے ایک بھیانک سڑک حادثہ ہوا۔ اس میں 4 نوجوانوں کی موقع پر ہی دردناک موت ہو گئی۔ حادثہ اس وقت پیش آیا جب ایک تیز رفتار کار سڑک کنارے کھڑے ایک ٹرک سے ٹکرا گئی۔ ٹکر اتنی زبردست تھی کہ کار پوری طرح سے تباہ ہو گئی اور دو لاش تو کار کے اندر بُری طرح پھنس گئی۔
حادثے میں جان گنوانے والے نوجوانوں کی شناخت ادھین بنسل، ادیپ، چراغ ملک اور ویبھو یادو کے طور پر ہوئی ہے۔ سبھی نوجوان کار سے ہماچل کی طرف سے آ رہے تھے اور اپنی منزل مقصود کی طرف جا رہے تھے کہ اچانک یہ حادثہ پیش آیا۔عینی شاہدین کے مطابق حادثہ کے بعد سڑک پر دل دہلا دینے والا منظر تھا۔ کار کے پرخچے اڑ گئے تھے اور دو لاشوں کو باہر نکالنے میں کافی مشقت کرنی پڑی۔ اطلاع ملتے ہی پولیس اور ایمبولنس موقع پر پہنچی اور لوگوں کی مدد سے لاشوں کو باہر نکالا گیا۔
پولیس نے چاروں مہلوکین کی لاش کو قبضے میں لے کر پوسٹ مارٹم کے لیے سیکٹر-6 سول اسپتال کی مورچری میں بھیج دیا۔ واقعہ کی وجوہات کی جانچ کی جا رہی ہے۔ ابتدائی جانچ میں تیز رفتار گاڑی چلانا حادثے کی وجہ مانی جا رہی ہے۔ پولیس سی سی ٹی وی فوٹیج کی بھی جانچ کر رہی ہے تاکہ حادثے کی صحیح وجہ کا پتہ لگایا جا سکے۔ حادثہ کی خبر ملتے ہی مہلوکین کے کنبہ میں کہرام مچ گیا اور عزیزوں کا رو رو کر بُرا حال ہے۔وہیں دوسری طرف ہفتہ کی دیر رات شری ماتا ویشنو دیوی کے آدھار شیور کٹڑا سے جموں آ رہی ایک بس تاریکی میں مانڈا، رام کے موڑوں میں قریب 30 فٹ گہری کھائی میں جا گری۔ اس حادثے میں بس ڈرائیور کی موت ہو گئی جبکہ بس پر سوار 17 مسافر زخمی ہو گئے۔ کئی زخمیوں کو سنگین چوٹ آئی ہے جبکہ دیگر کی حالت مستحکم ہے۔
