وزیراعلیٰ کے خطاب سے ہوگا میٹنگ کا آغاز

پٹنہ (ت ن س)23جون کو پٹنہ میں اپوزیشن جماعتوں کے اتحاد کیلئے ہونے والی اہم میٹنگ کی تیاریاں آخری مرحلے میں ہیں۔ ذرائع کے مطابق وزیراعلیٰ نتیش کمار کے خطاب سے اس میٹنگ کا آغاز ہوگا۔ پٹنہ کے ایک انےمارگ میں میٹنگ کی تیاریاں کی جارہی ہیں۔ادھر وزیراعلیٰ نتیش کمار کل منگل کو تامل ناڈو روانہ ہونگے جہاں وہ تامل ناڈو کے وزیراعلیٰ اسٹالن سے ملاقات کریںگے اور انہیں میٹنگ میں شرکت کی باضابطہ دعوت دیںگے۔ وزیراعلیٰ 21جون کو پٹنہ واپس آئیںگے۔ ذرائع کے مطابق پٹنہ میں یہ میٹنگ صبح 11 بجے شروع ہوگی اورشام 4 بجے تک جاری رہے گی۔ اس دوران تمام سیاسی رہنما ایک ساتھ لنچ بھی کریں گے۔عام اجلاس کے آغاز میں اس بات پر اجتماعی بحث ہو گی کہ ملک کو اس وقت کن بڑے مسائل کا سامنا ہے۔ مہنگائی اور بے روزگاری کے ساتھ ساتھ مرکزی حکومت کس طرح آئین میں تبدیلی کا کام کر رہی ہے۔ اس پر بھی بات کی جائے گی۔عام اجلاس میں نتیش کمار کے خطاب کے بعد کانگریس کے قومی صدر ملکارجن کھڑگے اپنی بات رکھیں گے اور بتائیں گے کہ اپوزیشن کا اتحاد کیوں ضروری ہے۔ بی جے پی کے خلاف ون فار ون فارمولے پر بھی بات کی جائے گی کہ اسے مختلف ریاستوں میں کیسے ممکن بنایاجائے۔مغربی بنگال کی وزیر اعلیٰ ممتا بنرجی نے پٹنہ میں اپوزیشن اتحاد کیلئے عام اجلاس منعقد کرنے کی تجویز پیش کی تھی۔ اس لیے وہ جلسہ عام سے خصوصی خطاب کریں گی۔ ممتا بنرجی کے ساتھ دہلی کے وزیر اعلی اروند کیجریوال، جھارکھنڈ کے وزیر اعلی ہیمنت سورین اور تمل ناڈو کے وزیر اعلی اسٹالن بھی میٹنگ سے خطاب کریں گے۔ممکن ہے کہ اروند کیجریوال یہ مسئلہ بھی اٹھائیں کہ کس طرح مرکزی حکومت نے سپریم کورٹ کے فیصلے کے بعد دہلی حکومت کو دیا گیا حق آرڈیننس لاءکر ختم کر دیا۔ وہ ماضی میں بھی یہ مسئلہ اٹھا چکے ہیں۔ کانگریس نے بھی اروند کیجریوال کی حمایت کی ہے۔این سی پی لیڈر شرد پوار، شیوسینا (ادھو، بالا صاحب ٹھاکرے) کے سربراہ ادھوٹھاکرے بتائیںگے کہ مہاراشٹر میں اپوزیشن اتحادکو کس طرح مضبوط کیاجاسکتاہے۔ یوپی کے سابق وزیر اعلی اور ایس پی لیڈر اکھلیش یادو یوپی کے بارے میں بات کریں گے۔راہل گاندھی کے خطاب کے حوالے سے موصولہ اطلاعات کے مطابق عام اجلاس کے اختتام پر کانگریس لیڈر راہل گاندھی اپنا نظریہ پیش کریں گے۔اس میٹنگ میں بہار کے نائب وزیر اعلی تیجسوی یادو اور جے ڈی یو کے قومی صدر راجیو رنجن سنگھ عرف للن سنگھ بھی موجود رہیں گے۔ریاستی گیسٹ ہاؤس میںمیٹنگ میں حصہ لینے آنے والے سیاسی رہنماؤں کے قیام کا انتظام کیا گیا ہے۔ پٹنہ آنے کے فوراً بعد وہ سرکاری گیسٹ ہاؤس جائیں گے۔ ان کے ساتھ آنے والوں کے لیے پٹنہ سرکٹ ہاؤس میں انتظامات کیے گئے ہیں۔ وہاں سے وہ وزیر اعلیٰ کی رہائش گاہ پہنچیں گے۔