کشمیر میں شدت کی سردی کے باعث پانی کی سپلائی لائنیں منجمد

سری نگر: کشمیر میں شدت کی سردی مختلف مقامات پر پانی کے ذخائر منجمد ہو نے کی خبر ہے جبکہ کئی مقامات پر پانی سپلائی کی لائنیں بھی منجمد ہو گئیں۔ جمعہ کو ‘چلائی کلاںنامی شدید سردی کے 40 دن کے طویل عرصے کا دوسرا دن تھا، یہ مدت 30 جنوری کو ختم ہوگی۔وادی میں جھیلیں جزوی طور پر منجمد ہو گئی ہیں۔ ملاحوں نے سری نگر شہر کی ڈل جھیل میں جزوی طور پر جمے ہوئے پانی سے اپنا راستہ بنایا۔ پورے علاقے میں لوگوں کو پینے کے پانی کے پائپوں کے گرد آگ جلاتے ہوئے دیکھا گیا۔محکمہ موسمیات کے ایک بیان میں کہا گیا، ’’آج سری نگر میں کم سے کم درجہ حرارت منفی 3.3 ڈگری سیلسیس درج کیا گیا، جبکہ گلمرگ اور پہلگام میں بالترتیب منفی ایک ڈگری اور منفی 4.8 ڈگری سیلسیس درج کیا گیا۔
لداخ خطہ کے لیہہ شہر میں کم سے کم درجہ حرارت منفی 14.4 ڈگری سیلسیس، کرگل میں منفی 9.9 اور دراس میں منفی 12.3 ڈگری سیلسیس رہا۔ جموں شہر میں رات کا کم سے کم درجہ حرارت 8.5 ڈگری سیلسیس، کٹرا میں 7.9، بٹوٹ میں 6.3، بھدرواہ میں 3.5 اور بانہال میں 3.8 ڈگری سیلسیس رہا۔