بہارکو ترقی کےراستے پر لانےکے لئے ویژن کی ضرورت ۔چراغ پاسوان

نئی دہلی: مرکزی وزیر اور لوک جن شکتی پارٹی (رام ولاس) قائد چراغ پاسوان نے حکومت ِ بہار سے کہا ہے کہ وہ جرائم کیس اور حال ہی میں پلوں کے منہدم ہونے کے واقعات میں سخت کارروائی کرتے ہوئے ایک نظیر قائم کرے۔انہوں نے زور دے کر کہا کہ ریاست کو ترقیکےراستے پر لانے کے لئے ویژن کی ضرورت ہے۔ وزیر اعلیٰ بہار اور جنتادل (یو) صدر نتیش کمار کے کبھی ناقد رہے، چراغ پاسوان نے کہا کہ برسراقتدار این ڈی اے اگلا اسمبلی الیکشن نتیش کمار کی قیادت میں لڑے گا، لیکن انہوں نے کئی مسائل گنائے جو ان کے بقول ریاست کی ترقی میں رکاوٹ ہیں۔بہار میں اسمبلی الیکشن 2025ء کے اواخر میں ہونے والا ہے۔
چراغ پاسوان نے پی ٹی آئی سے کہا ”بہاری اتنا آگے ہے تو بہار اتنا پچھڑا کیوں؟ ہمیں اِس سوال کا جواب ڈھونڈنے کی ضرورت ہے“۔انہوں نے کہا کہ ریاست کے لوگوں نے بہار سے نقل مقام کرنے کے بعد مختلف شعبوں چاہے اعلیٰ سرکاری عہدے ہوں یاخانگی شعبہ ہر جگہ اپنا لوہا منوایا ہے۔ مسئلہ یہ ہے کہ ایک ویژن ضروری ہے۔انہوں نے زور دے کر کہا کہ ریاست سے نقل مقامی روکنی ہوگی۔ 23جولائی کے عام بجٹ سے قبل انہوں نے بہار کو خصوصی زمرے کا موقف دینے کے مطالبہ کی تائید کی۔ اسی کے ساتھ انہوں نے کہا کہ نیتی آیوگ کی سفارشات اس کے خلاف ہیں۔لہٰذا ریاست کو خصوصی پیکیج جیسا متبادل کیا جانا چاہئے۔ حالیہ مہینوں میں تقریباً 15پل منہدم ہوجانے کے بارے میں پوچھنے پر انہوں نے کہا کہ یہ سنگین مسئلہ ہے۔ یہ یقینا بتاتا ہے کہ کہیں نہ کہیں کرپشن ہوا ہے۔میں سیاست میں پڑنا نہیں چاہتا کہ حکومت میں کون تھا، اب ہم حکومت میں ہیں۔ ہماری ذمہ داری بنتی ہے کہ اِس کا اعادہ نہ ہو۔ خاطیوں کو سزا ملے تاکہ مستقبل کے لئے نظیر قائم ہو۔