ہندوستانی شئر بازار میں کہرام:سنسیکس اور نفٹی دونوں میں زبردست گراوٹ

ممبئی :شیئر بازار میں آج کا دن سرمایہ کاروں کے لیے اچھا نہیں رہا۔سنسیکس اور نفٹی دونوں میں زبردست گراوٹ دیکھنے کو ملی۔ آئندہ ہفتہ مرکزی بجٹ سے پہلے سرمایہ کاروں کے ذریعہ مختلف شعبوں میں منافع وصولی کیے جانے کے سبب مڈکیپ اور اسمال کیپ سگمنٹ میں گراوٹ آئی ہے۔جبکہ کمزور عالمی اشاروں نے بھی گھریلو بازار میں گراوٹ کو حوصلہ بخشا۔
میڈیا رپورٹس کے مطابق نفٹی-50 جہاں 270 پوائنٹس یا 1.09 فیصد کی گراوٹ کے ساتھ 24530.90 پر بند ہوا، وہیں سنسیکس 739 پوائنٹس یا 0.91 فیصد کی گراوٹ کے ساتھ 80604.65 پر بند ہوا۔ بی ایس ای مڈکیپ اور اسمال کیپ انڈیکس میں 2 فیصد سے زیادہ کی گراوٹ دیکھنے کو ملی ہے۔ بی ایس ای میں فہرست بند فرموں کا مجموعی مارکیٹ کیپ گزشتہ سیشن کے تقریباً 454.3 لاکھ کروڑ روپے سے گھٹ کر تقریباً 446.3 لاکھ کروڑ روپے رہ گیا، جس سے سرمایہ کاروں کو ایک ہی سیشن میں تقریباً 8 لاکھ کروڑ روپے کا نقصان ہوا۔
قابل ذکر ہے کہ امریکی صدارتی عہدہ کی دوڑ کے نتائج سے متعلق بڑھتی غیر یقینی کے درمیان جمعہ کے روز دنیا بھر کے بازاروں میں مایوسی دیکھنے کو ملی۔ اس کے علاوہ دن میں مائیکروسافٹ کلاؤڈ آؤٹیج کے بعد لندن اسٹاک ایکسچینج سے لے کر ہندوستانی ایئرلائنس تک وسیع اثر دیکھنے کو ملا ہے۔ لندن میں اسٹاک مارکیٹ نے مشکل حالات کو دیکھ کر کاروبار ہی بند کر دیا۔