شمالی ہندوستان میں سردی میں کوئی کمی نہیں

نئی دہلی :محکمہ موسمیات کے مطابق پیر کی صبح پنجاب، دہلی، راجستھان، بہار، آسام، مغربی بنگال اور سکم کے بیشتر علاقوں میں گھنے کہرے چھایا رہا۔ دہلی میں مسلسل چوتھے دن پارہ 3.3 ڈگری سیلسیس تک گر گیا۔ اسی وقت، پنجاب کے نوانشہر میں کم سے کم درجہ حرارت منفی 0.2 ڈگری اور ہریانہ کے مہندر گڑھ میں 4 ڈگری سیلسیس ریکارڈ کیا گیا۔شمال مغربی سمت سے چلنے والی ٹھنڈی ہواؤں کی وجہ سے صبح کے وقت سردی کی شدت میں اضافہ دیکھاجارہاہے۔ پیر کو دہلی میں کم سے کم درجہ حرارت معمول سے چار ڈگری کم تھا۔ یہ اس موسم کی سرد ترین صبح تھی۔ علاقائی موسمیاتی مرکز، نئی دہلی کے مطابق، پیر کو دہلی کا زیادہ سے زیادہ درجہ حرارت 19.7 ڈگری سیلسیس ریکارڈ کیا گیا۔ اس کے ساتھ ہی کم از کم درجہ حرارت 3.3 ڈگری سیلسیس ریکارڈ کیا گیا جو معمول سے چار ڈگری کم ہے۔ یہ اتوار سے 0.2 ڈگری کم ہے۔ محکمہ موسمیات نے آئندہ دو روز کے لیے اورنج الرٹ جاری کر دیا ہے۔
شمالی ہندوستان کے بیشتر علاقوں میں سردی میں کوئی کمی نہیں ہوئی۔ گھنے کہرے کی وجہ سے دہلی میں 400 سے زیادہ گھریلو اور بین الاقوامی پروازیں اور 100 سے زیادہ ٹرینیں متاثر ہوئیں۔ 68 پروازوں کو منسوخ کرنا پڑا، جبکہ چار پروازوں کو جے پور اور ایک کو احمد آباد کی طرف موڑ دیا گیا۔محکمہ موسمیات نے کہا کہ شمال مغربی۔ ہندوستان کے میدانی علاقوں میں اگلے تین دن تک سردی کی لہر برقرار رہے گی۔ ایک کمزور مغربی ڈسٹربنس 16 جنوری کو مغربی ہمالیائی علاقے کو متاثر کر سکتا ہے۔ اس کے اثر کی وجہ سے جموں کشمیر، ہماچل پردیش، لداخ میں 16۔17 جنوری اور اتراکھنڈ میں 17۔18 جنوری کو ہلکی اور تیز بارش ہو سکتی ہے۔ بہار، جھارکھنڈ، چھتیس گڑھ اور شمال مشرقی ریاستوں میں کچھ مقامات پر بارش کا امکان ہے۔