کشی نگر:اتر پردیش کے کشی نگر میں دردناک سڑک حادثہ پیش آیا ہے۔ یہاں ایک کار پیڑ سے ٹکرا گئی جس سے 6 لوگوں کی موت ہو گئی جبکہ دو دیگر افراد زخمی ہوئے ہیں۔ یہ معاملہ نیبوا نونگریا تھانہ حلقہ کے بھوجولی چوراہے کا بتایا جا رہا ہے۔ حادثہ اتنا خطرناک تھا کہ کار کو گیس کٹر سے کاٹ کر لاشوں کو باہر نکالا گیا۔ پولیس نے لاشوں کو پوسٹ مارٹم کے لیے بھیج دیا ہے۔
اطلاع کے مطابق ضلع کے پڈرونا پنیہوا راستے کے پاس، نبیوا نورنگیا تھانہ حلقہ کے بھوجولی شکل گاؤں کے سامنے تیز رفتار سے آرہی کار بے قابو ہو کر پیڑ سے ٹکرا گئی۔ کار میں 8 افراد سوار تھے۔ رام کولا تھانہ حلقہ کے نارائن پور وجئے پور سے نبیوا نورنگیا کے دیو گاؤں میں بارات آئی تھی۔
حادثے کے بعد موقع پر چیخ و پکار مچ گئی۔ کچھ وقت کے لیے ٹریفک نظام بھی درہم برہم ہو گیا اور سڑک پر جام لگ گیا۔ کشی نگر کے ایس پی سنتوش کمار مشر نے بتایا کہ سڑک حادثے میں 6 لوگوں کی موت ہوگئی ہے جبکہ دو سنگین طور پر زخمی ہیں۔
بتایا جاتا ہے کہ تین لوگوں کی موقع پر ہی موت ہو گئی جبکہ پانچ دیگر زخمیوں کو علاج کے لیے اسپتال میں داخل کرایا گیا۔ تین لوگوں نے یہاں دم توڑ دیا۔ وہیں دو زخمی لوگوں کو علاج کے لیے گورکھپور بھیجا گیا ہے۔ وزیر اعلیٰ یوگی آدتیہ ناتھ نے کشی نگر حادثے پر گہرے دکھ کا اظہار کیا ہے اور زخمیوں کے علاج کے لیے افسروں کو ہدایات دی ہیں۔
