سدرشن نیوز کے ریذیڈنٹ ایڈیٹر مکیش کمارگرفتار

گروگرام: ہریانہ کے نوح اور گروگرام میں تشدد کے بعد امن بحال کرنے کی کوششوں کے درمیان سدرشن نیوز کے ریذیڈنٹ ایڈیٹر مکیش کمار کو گروگرام کی پولس کمشنر کلا رام چندرن کے خلاف سوشل میڈیا پلیٹ فارم ایکس (ٹوئٹر) پر ایک گمراہ کن پوسٹ کرنے کے الزام میں گرفتار کر لیا گیا۔ پولیس نے بتایا کہ سائبر کرائم اسٹیشن کی ٹیم نے اسے گرفتار کیا ہے۔
مکیش کمار کے خلاف 9 اگست کو آئی پی سی کی دفعہ 153بی، 401، 469 اور 505 (1) (سی) اور آئی ٹی ایکٹ کی دفعہ 66-سی کے تحت ایف آئی آر درج کی گئی تھی۔ ایک بیان میں گروگرام پولیس نے کہاعہ 8 اگست کو ​​ٹوئٹر پر بے بنیاد، غلط اور گمراہ کن حقائق پر مبنی ایک ٹوئٹ کیا گیا تھا۔ اس کا نوٹس لیتے ہوئے گروگرام پولیس نے مقدمہ درج کیا ہے اور معاملے کی مزید تفتیش جاری ہے۔‘‘
پولیس کے بیان میں مزید کہا گیا ’’آج بتاریخ 11 اگست 2023 کو گمراہ کن فرضی حقائق کو ٹوئٹ کرنے والے مکیش نامک شخص کو تھانہ سائبر گروگرام کی ٹیم نے گرفتار کر لیا۔موصولہ اطلاعات کے مطابق مکیش کمار نے ٹوئٹ کیا تھا کہ گروگرام پولیس کمشنر کو مبینہ طور پر الجزیرہ نیوز چینل سے کال موصول ہوئی ہے اور ان پر ہندوؤں کے خلاف کارروائی کرنے کے لیے دباؤ ڈالا جا رہا ہے۔ اس نے دعویٰ کیا کہ کال موصول ہونے کے بعد وہ اس قدر دباؤ میں آ گئیں کہ نہوں نے ہندوتوا تنظیموں کے کارکنوں کے خلاف کریک ڈاؤن شروع کر دیا۔
گروگرام پولیس کی یہ کارروائی 31 جولائی کو وشو ہندو پریشد کی یاترا کے دوران تشدد کے بعد نوح اور گروگرام اضلاع میں فرقہ وارانہ جھڑپوں کے کچھ دن بعد سامنے آئی ہے۔ تشدد نے حکومت کو نوح، پلول، ہوڈل اور سوہنا میں کرفیو نافذ کرنے اور موبائل انٹرنیٹ خدمات کو معطل کرنے پر مجبور کیا۔ اس تشدد میں 6 افراد ہلاک اور متعدد زخمی ہوئے تھے۔