شیو سینا (یو بی ٹی) کے لیڈر ابھیشیک گھوشالکرکا فیس بک لائیو کے دوران قتل

ممبئی: ایک سنسنی خیز واقعہ میں ادھو ٹھاکرے دھڑے یعنی شیو سینا (یو بی ٹی) کے لیڈر ابھیشیک گھوشالکر کو ممبئی کے دہیسر علاقے میں فیس بک لائیو کے دوران گولی مار کر ہلاک کر دیا گیا۔ بعد ازاں فائرنگ کے ملزم مورس نورونہا نے خود کو بھی گولی مار کر خودکشی کر لی۔ ملزم مورس نے پہلے ابھیشیک کے ساتھ فیس بک لائیو کیا، پھر انہیں گولی ماری اور اس کے بعد خود کشی کر لی۔
اس واقعہ میں ابھیشیک کو تین گولیاں لگیں جس کی وجہ سے وہ شدید زخمی ہو گئے۔ انہیں اسپتال لے جایا گیا، جہاں علاج کے دوران ان کی موت ہو گئی۔ وہیں، مورس بھی دم توڑ گیا۔ ممبئی پولیس نے دونوں کی موت کی تصدیق کر دی ہے۔ ممبئی پولیس نے کہا کہ شیو سینا (یو بی ٹی) کے رہنما ابھیشیک گھوسالکر کی دہیسر علاقے میں فائرنگ میں گولی لگنے سے موت ہو گئی ہے۔ ابھیشیک کو گولی مارنے کے ملزم موریس نورونہا کی لاش اسپتال لائی گئی ہے۔