سماجوادی پارٹی کی جانب سےمزید 11لوک سبھا امیدواروں کا اعلان

لکھنئو: سماجوادی پارٹی نے اتر پردیش کی مزید 11 پارلیمانی سیٹوں کے لیے امیدواروں کا اعلان کر دیاہے۔اس سے پہلے پارٹی 16 پارلیمانی سیٹوں کے لیے امیدواروں کا اعلان کر چکی ہے۔ غازی پور سے مختار انصاری کے بھائی افضال انصاری کو ٹکٹ دیا گیا ہے، جبکہ مظفر نگر سے ہریندر ملک کو امیدوار بنایا گیا ہے۔سماجوادی پارٹی نے پیر کے روز امیدواروں کی تازہ فہرست جاری کی جس میں شاہجہاں پور سے راجیش کشیپ، ہردوئی سے اوشا ورما، مشرخ سے رامپال راجونشی، موہن لال گنج سے آر کے چودھری، پرتاپ گڑھ سے ایس پی سنگھ بگھیل، بہرائچ سے رمیش گوتم، گونڈا سے شریا ورما، چندولی سے ویریندر سنگھ اور آنولا پارلیمانی سیٹ سے نیرج موریہ کو ٹکٹ دیا گیا ہے۔
اکھلیش یادو کی پارٹی یعنی سماجوادی پارٹی نے 30 جنوری کو پہلی فہرست جاری کی تھی جس میں 16 امیدواروں کے نام کا اعلان کیا گیا تھا۔ اس فہرست کے مطابق ڈمپل یادو کو مین پوری، شفیق الرحمن برق کو سنبھل اور روی داس مہروترا کو لکھنؤ لوک سبھا سیٹ سے امیدوار بنایا گیا ہے۔ سماجوادی پارٹی کے ذریعہ نئی فہرست جاری کیے جانے کے بعد مجموعی طور پر 27 سیٹوں کے لیے امیدواروں کا نام سامنے آ چکا ہے۔