نیٹ پیپر لیک ہونے کی خبرپرپرینکا گاندھی کا سوال

نئی دہلی :کانگریس کی جنرل سکریٹری پرینکا گاندھی نے نیٹ پیپر لیک ہونے کی خبر پر افسوس کا اظہار کرتے ہوئے وزیر اعظم نریندر مودی کی خاموشی پر سوال اٹھایا ہے۔ انہوں نے کہا ہے کہ نوجوانوں کے مستقبل کے ساتھ کھیلا جا رہا ہے اور پی ایم مودی اس پورے معاملے پر خاموش ہیں۔رینکا گاندھی نے سوشل میڈیا پیلٹ فارم ’ایکس‘ پر لکھا ہے کہ ایک بار پھر نیٹ کا پیپر لیک ہونے کی خبر آ رہی ہے۔ ملک کے 24 لاکھ نوجوانوں کے مستقبل سے ایک بار پھر کھلواڑ ہوا۔ گزشتہ دس سالوں سے کروڑوں ہونہار نوجوانوں کے ساتھ چل رہا یہ سلسلہ بند ہونے کا نام نہیں لے رہا ہے۔ کیا ملک کے وزیر اعظم اس پر کچھ کہیں گے؟ نوجوانوں کو بہلانے کے لیے پارلیمنٹ میں پیپر لیک کے خلاف قانون پاس ہوا تھا، وہ قانون کہاں ہے؟ لاگو کیوں نہیں ہوتا؟
کانگریس کی جنرل سکریٹری نے اپنی پوسٹ میں مزید کہا ہے کہ اسی لیے بے روزگاری اور نوکریوں میں بدعنوانی اس الیکشن کا سب سے بڑا موضوع ہے۔ ہمارے نیائے پتر(انتخابی منشور) کا عزم ہے کہ پیپر لیک ہونا بند ہو گا۔ بھرتیاں کیلنڈر کے مطابق نکلیں گی۔ خالی آسامیاں پر کی جائیں گی۔ نوجوانوں کے مستقبل کے ساتھ یہ کھلواڑ بند ہو گا اور ہم یہ کر کے دکھائیں گے۔واضح رہے کہ ملک بھر میں اتوار (5مئی) کو نیشنل الیجیبلٹی کم انٹرنس ٹیسٹ (نیٹ) کا یوجی امتحان منعقد ہوا تھا۔ اس دوران سوائی مادھو پور کے ایک مرکز سے کچھ امیدوار سوالنامہ لے کر زبردستی باہر نکل گئے تھے۔ اس کے بعد نیشنل ٹیشٹنگ ایجنسی (این ٹی اے) کا بیان سامنے آیا جس میں اس نے کہا کہ پیپر لیک ہونے کی خبریں غلط ہیں۔