اورنگ زیب کو لے کر مہاراشٹر میں زبردست تنازعہ چل رہا ہے۔ واٹس ایپ پر اس کی تعریف میں اسٹیٹس لگانا بھی ہندوتوا تنظیموں کے لیڈران کو منظور نہیں ہے۔ اس معاملے پر مہاراشٹر کے کئی شہروں میں گزشتہ دنوں تشدد بھی دیکھنے کو ملا۔ اب بابا صاحب امبیڈکر کے پوتے اور وَنچت بہوجن اگھاڑی کے چیف پرکاش امبیڈکر نے اورنگ زیب کے مقبرہ پر حاضری دے کر سبھی کو حیران کر دیا ہے۔ پرکاش امبیڈکر نے 17 جون کو خلد آباد میں موجود اورنگ زیب کے مقبرہ پر حاضری دی۔
میڈیا رپورٹس کے مطابق چھترپتی سنبھاجی نگر (اورنگ آباد) سے 24 کلو میٹر دور خلد آباد میں اورنگ زیب کے مقبرہ پر پرکاش امبیڈکر نے حاضری دی اور گلپوشی بھی کی۔ اس کے بعد ایک نیوز چینل سے بات کرتے ہوئے انھوں نے کہا کہ ’’اورنگ زیب نے ہندوستان میں 50 سال تک راج کیا ہے۔ کیا اس حقیقت کو مٹا سکتے ہیں؟ اگر گالیاں ہی دینی ہیں تو جئے چند کو دیجیے، اورنگ زیب کو کیوں؟ جئے چندوں کی وجہ سے ہی باہری طاقتیں طاقتور ہوئیں۔ اورنگ زیب کا کیا قصور؟‘‘
جب صحافی نے یہ سوال کیا کہ حال ہی میں اورنگ زیب سے جڑے تنازعہ کی وجہ سے ریاست میں فسادات ہوئے ہیں، پھر بھی آپ اورنگ زیب کے مقبرے پر پہنچ کر ان کے تئیں اپنا احترام کیوں ظاہر کر رہے ہیں، تو انھوں نے کہا کہ میں اگر وزیر اعلیٰ ہوتا تو فسادات ہوتے ہی نہیں۔ یہ حکومت فساد روکنے میں ناکام ہوئی ہے۔ میرے رہتے اگر فسادات ہوتے تو میں دو دنوں میں دبا دیتا۔
