مودی کی جانب سےحکومت سازی کا دعویٰ پیش۔حلف برداری 9جون کو

نئی دہلی:این ڈی اے پارلیمانی پارٹی کے قائد نریندر مودی نے آج صدر جمہوریہ سے مل کر حکومت سازی کا دعویٰ پیش کردیا ،وہ 9جون کو وزیر اعظم کے عہدے کا حلف لیں گے ۔اس سے پہلے این ڈی اے پارلیمانی پارٹی کے اجلاس کے دوران نریندر مودی کو متفقہ طور پر اتحادکا قائد منتخب کیا گیا۔ سینئر بی جے پی لیڈر راج ناتھ سنگھ نے جمعہ کو نریندر مودی کو نیشنل ڈیموکریٹک الائنس (این ڈی اے) پارلیمانی پارٹی کا لیڈر منتخب کرنے کی تجویز پیش کی، جس کی تمام پارٹی لیڈران اور اتحادیوں نے تائید کی۔پارلیمنٹ ہاؤس کی پرانی عمارت میں واقع آئین ساز ادارے کے سنٹرل ہال میں این ڈی اے کی میٹنگ میں راج ناتھ سنگھ کی تجویز پیش کی جس پر سب سے پہلے امیت شاہ، پھر نتن گڈکری اور پھر این ڈی اے کے دیگر جماعتوں کے لیڈروں نے تائید کی۔تائید کرنے والے اہم این ڈی اے لیڈروں میں پہلا نام جنتا دل (سیکولر) کے ایچ ڈی کمار سوامی کا تھا۔ اس کے بعد تلگو دیشم پارٹی (ٹی ڈی پی) کے لیڈر این چندرابابو نائیڈو اور پھر جنتا دل (یونائیٹڈ) کے نتیش کمار نے مودی کو این ڈی اے پارلیمانی پارٹی کا لیڈر منتخب کرنے کی تجویز کی تائید کی۔
شیوسینا کے ایکناتھ شندے اور نیشنلسٹ کانگریس پارٹی کے اجیت پوار سمیت این ڈی اے کے دیگر حلقوں کے قائدین نے بھی اس تجویز کو منظور کر لیا ہے۔ اجلاس کے بعد این ڈی اے حکومت سازی کا دعویٰ پیش کرے گا۔ پارلیمانی پارٹی کے لیڈر نریندر مودی نے اجلاس سے خطاب کرتے ہوئے اتحادیوں کا شکریہ ادا کیا۔این ڈی اے کی مشترکہ میٹنگ میں مودی نے کہا کہ یہ میرے لیے خوشی کی بات ہے کہ مجھے آج اتنے بڑے گروپ کا استقبال کرنے کا موقع ملا ہے۔ جو دوست جیت گئے وہ مبارکباد کے مستحق ہیں۔ لاکھوں کارکنوں نے دن رات محنت کی ہے۔ آج ہم آئین ساز ادارےکے سنٹرل ہال سے سر جھکا کر سلام پیش کرتے ہیں کہ اتنی سخت گرمی میں ہر پارٹی کے کارکنان نے جو محنت کی ہے۔