مودی پرپرینکا کاطنز ۔ گارنٹی روزگار کی نہیں ، بے روزگاری کی ہے

نئی دہلی: کانگریس جنرل سکریٹری پرینکا گاندھی واڈرا نے بے روزگاری پر وزیر اعظم نریندر مودی کو نشانہ بناتے ہوئے کہا کہ وہ الیکشن آتے ہی گارنٹی کی بات کرنے لگتے ہیں لیکن حقیقت تو یہ ہے کہ وزیر اعظم مودی کی گارنٹی روزگار کی نہیں بلکہ بے روزگاری کی گارنٹی ہے!اپنے ایکس اکائونٹ پرپرینکا گاندھی نے کہا، ’’اعداد و شمار کے مطابق، ملک میں تقریباً 30 لاکھ سرکاری عہدے خالی ہیں، ہمارے کروڑوں نوجوان نوکریوں کا انتظار کر رہے ہیں لیکن گزشتہ 10 سالوں میں بی جے پی حکومت نے ان عہدوں کو پُر کرنے کے لیے دکھاوے کے سوا کچھ نہیں کیا۔
انہوں نے کہا، ’’جولائی، 2022 میں حکومت نے پارلیمنٹ کو اطلاع دی تھی کہ 8 سال میں 22 کروڑ نوجوانوں نے نوکریوں کے لیے درخواست دی لیکن نوکری ملی صرف 7 لاکھ نوجوانوں کو۔ یعنی تقریباً 21.93 کروڑ اہل نوجوان بے روزگار رہ گئے۔ سالانہ دو کروڑ نوکریوں کا وعدہ کرنے والی بی جے پی حکومت نہ پہلے سے موجود نوکریاں دے سکی اور نہ ہی نئے روزگار کے مواقع پیدا کر سکی۔ وزیر اعظم الیکشن میں گارنٹی دیتے ہیں۔ اصل میں ان کی گارنٹی صرف بے روزگاری کی ہی گارنٹی ہے۔