مختار انصاری کی طبیعت پھر بگڑی

باندہ:مختار انصاری کی طبیعت ایک بار پھر بگڑ گئی ہے۔ باندہ جیل میں بند مختار انصاری کو جمعرات کی شب اچانک دل کا دورہ پڑا جس کے بعد انھیں فوری طور پر میڈیکل کالج لے جایا گیا۔ وہاں ان کا علاج چل رہا ہے اور وہ ڈاکٹروں کی سخت نگرانی میں ہیں۔میڈیا رپورٹس کے مطابق جیل میں تین ڈاکٹروں کا پینل مختار انصاری کی صحت پر لگاتار نظر بنائے ہوئے تھا، لیکن ان کی صحت میں کوئی بہتری نہیں ہو رہی تھی۔ آج جب انھیں دل کا دورہ پڑا تو ڈاکٹروں نے فوری طور پر انھیں میڈیکل کالج منتقل کرنا مناسب سمجھا۔واضح رہے کہ رواں ماہ 27 تاریخ کی دیر شب تقریباً 4 بجے طبیعت ناساز ہونے پر مختار انصاری کو باندہ جیل سے اچانک میڈیکل کالج لے جایا گیا تھا۔ صبح ہوتے ہوتے جب یہ خبر پھیلی تو پتہ چلا کہ ان کی حالت سنگین ہے۔ آئی سی یو میں ونٹلیٹر پر علاج کرائے جانے کی خبریں بھی سامنے آئیں، اور پھر مختار انصاری کے گھر والوں کے ساتھ ساتھ ان کے چاہنے والے بھی باندہ پہنچنا شروع ہو گئے۔ حالانکہ کسی کو بھی ان سے ملنے نہیں دیا گیا۔
تقریباً 16 گھنٹے آئی سی یو میں ایڈمٹ رہنے کے بعد مختار انصاری کو ڈسچارج کیا گیا تھا اور تب میڈیکل کالج انتظامیہ کی طرف سے بتایا گیا تھا کہ مختار کی حالت پہلے سے بہتر ہے۔ یہ بھی جانکاری دی گئی کہ تین ڈاکٹروں کا ایک پینل بنایا گیا ہے جو جیل میں ان کی صحت کی دیکھ ریکھ میں رہے گا۔ اب ایک بار پھر مختار انصاری کی طبیعت خراب ہوئی ہے تو دوبارہ انھیں میڈیکل کالج میں ایڈمٹ کرایا گیا ہے۔