مہوا موئترا نے سرکاری بنگلہ خالی کردیا

نئی دہلی :ترنمول کانگریس کی لیڈر مہوا موئترا کو پارلیمانی رکنیت منسوخ ہونے کے بعد اب سرکاری بنگلہ بھی خالی کرنا پڑ گیا ہے۔ لوک سبھا رکن کے طور پر ملے گھر کو انھوں نے جمعہ کی صبح خالی کیا۔ بتایا جاتا ہے کہ ڈائریکٹوریٹ آف اسٹیٹس (جائیداد ڈائریکٹوریٹ) کی ایک ٹیم یہ دیکھنے کے لیے بھیجی گئی تھی کہ موئترا نے سرکاری رہائش کو چھوڑا ہے یا نہیں۔ مہوا موئترا کے وکیل کا کہنا ہے کہ اتھارٹیز کے پہنچنے سے پہلے ہی بنگلہ خالی کر دیا گیا تھا۔میڈیا رپورٹس کے مطابق مہوا موئترا کے وکیل نے بتایا کہ ٹیلی گراف لین پر مہوا موئترا کے بنگلہ 9بی کو اتھارٹیز کے پہنچنے سے پہلے ہی آج صبح 10 بجے خالی کر دیا گیا تھا۔ بے دخلی کی کوئی کارروائی نہیں ہوئی ہے۔ وکیل نے یہ بھی کہا کہ مکان کا قبضہ ڈائریکٹوریٹ آف اسٹیٹس کے افسران کے سپرد کر دیا گیا ہے۔
گزشتہ ماہ لوک سبھا کی رکنیت منسوخ ہونے کے بعد موئترا کو دو بار سرکاری بنگلہ خالی کرنے کا نوٹس بھیجا گیا۔ پہلی بار بھیجے گئے نوٹس میں 7 جنوری تک بنگلہ خالی کرنے کی ہدایت دی گئی تھی۔ پھر 8 جنوری کو ڈائریکٹوریٹ نے بنگلہ نہ خالی کرنے کے لیے تین دن کے اندر جواب مانگا تھا۔ پھر 12 جنوری کو انھیں مزید ایک نوٹس دیا گیا۔ مہوا موئترا کو بھیجے گئے آخری نوٹس میں کہا گیا تھا کہ اگر موئترا نے بنگلہ خالی نہیں کیا تو ایک ٹیم بھیجی جائے گی جو سرکاری رہائش کو خالی کرایا جانا یقینی بنائے گی۔ حالانکہ آج خود ہی مہوا موئترا نے بنگلہ خالی کر دیا۔