ممبئی: بہار کے کھگڑیا ضلع سے سائبر ٹھگی میں ایک 30 سالہ شخص سجیت کمار کو گرفتار کیا گیا ہے۔ اس کے تار کمبوڈیا سے بھی جڑے ہیں۔ جمعہ کو ممبئی پولیس نے اس کا پردہ فاش کرتے ہوئے یہ جانکاری دی۔ذرائع کے مطابق سجیت کمار کھگڑیا ضلع کے مہیش کھونٹ تھانہ حلقہ کے نیا نگر بنّی کا رہنے والا ہے۔ اس کی گرفتاری کے لیے اتوار کو نوی ممبئی کے سائبر پولیس سب انسپکٹر روہت مہیش کھونٹ تھانہ پہنچے۔ پیر کو مقامی پولیس کے تعاون سے نیا نگر بنّی میں چھاپہ ماری کرکے مدن کمار کے بیٹے سجیت کمار کو گرفتار کیا گیا۔ ممبئی پولیس نے بتایا کہ سجیت کمار کے خلاف سائبر تھانہ نوی ممبئی میں معاملہ درج ہے جو سائبر ٹھگی سے متعلق ہے۔
بتایا جاتا ہے کہ جنوری اور اگست 2024 کے درمیان سجیت نے آن لائن شیئر ٹریڈنگ کے نام پر نوی ممبئی کے شخص کو شیئر ٹریڈنگ میں سرمایہ پر بہترین ریٹرن کا یقین دلا کر جال میں پھنسایا اور اس سے 148891665 (تقریباً 15 کروڑ) روپے کی ٹھگی کر لی۔ پولیس نے تکنیکی اور خفیہ انپٹ سمیت کئی سراغ پر کام کیا اور بہار کے رہنے والے ملزم تک پہنچ گئی۔ پوچھ تاچھ کے دوران سجیت نے قبول کیا کہ جون 2023، جنوری 2024 اور فروری اور جون 2024 میں اس نے کمبوڈیا سے کال سینٹر کے توسط سے کئی ہندوستانی شہریوں کو نشانہ بنایا۔سائبر پولیس نے شکایت پر نئے فوجداری ضابطہ بی این ایس اور آئی ٹی قانون کی متعلقہ دفعات کے تحت اطلاع اول درج کی ہے۔ ملزم سے پوچھ تاچھ میں پتہ چلا کہ اس نے کمبوڈیا میں رہنے کے دوران کال سینٹروں میں کام کیا اور ہندوستانیوں کو دھوکہ دہی کے تحت نشانہ بنایا۔
ذرائع سے ملی اطلاع کے مطابق سجیت کمار سم خریدتا تھا اور انہیں کمبوڈیا میں اپنے معاونین کو سپلائی کرتا تھا۔ وہ کئی ٹیلی گرام گروپ کا رکن بھی تھا اور جنوب مشرقی ایشیائی ممالک کے لوگوں سے جڑا ہوا تھا۔ پتہ چلا ہے کہ وہ ہندوستان میں دیگر معاونین کے رابطے میں بھی تھا۔
