نئی دہلی: جماعت اسلامی ہند کا ایک وفد جس میں جناب سلیم انجینئر نائب امیر جماعت و جناب شفیع مدنی ،سکریٹری شامل تھے۔ وفد نے کولانی (تیلیا باس، رگھناتھ گڑھ) ضلع الور کا دورہ کیا اوریہاں اس متاثرہ خاندان کے افراد سے ملاقات کی جس کی ایک نوزائیدہ بچی پولیس کے جوتے سے کچلنے کے سبب موت کے منہ میں چلی گئی۔ یہ خوفناک واقعہ دو مارچ کو پیش آیا جب نوگاوں پولیس اسٹیشن کے اہلکاروں نے سائبر کرائم کی تحقیقات کے بہانے صبح سویرے چھاپہ مارا ۔ حیرت کی بات یہ ہے کہ یہ آپریشن بغیر کسی وارنٹ کے کیا گیا اور ساتھ میں کوئی خاتون اہلکار کو بھی نہیں رکھا گیا۔ گھر میں ایک نو زائیدہ بچی بستر پر سو رہی تھی، پولیس والے بستر پر چڑھ گئے جس کی وجہ سے بچی کچل گئی اور اس کی موت واقع ہوگئی۔ پولیس کے اس غیر انسانی رویے سے پورے گائوں کے لوگ گہرے صدمے میں ہیں اورعلاقے میں خوف و ہراس کا ماحول پیدا ہوگیا ہے۔ دورے کے دوران وفد نے متاثرہ خاندان سے ملاقات کی، ان کی تعزیت کی اور اظہار ہمدردی کیا۔ وفد نے گاوں کے بزرگوں اور مقامی لیڈروں سے بھی بات چیت کی جن میں راجستھان کے سابق وزیر جناب نصر الدین بھی شامل ہیں جنہوں نے صورت حال کی تفصیلات بتائی۔ وفد نے لواحقین کو انصاف کے حصول میں ہر ممکن تعاون دینے کی یقین دہانی کرائی۔
اس موقع پر پروفیسر سلیم انجینئر اور مولانا شفیع مدنی اس احتجاجی مقام پر بھی گئے جہاں گاؤں کے لوگ پورے واقعہ کی جانچ اور انصاف کا مطالبہ کرنے کے لئے جمع تھے۔ مجمع سے خطاب کرتے ہوئے پروفیسر سلیم نے اپنی مختصر و جامع گفتگو میں دھرنے پر بیٹھے ہوئے عوام کو حوصلہ بخش پیغام دیتے ہوئے کہا کہ ہمارا حقیقی محافظ تو اللہ تعالیٰ ہے، ہمیں اسی سے امید رکھنی چاہیے اور مایوسی کو ترک کرنا چاہیے، ساتھ ساتھ انصاف کی اس لڑائی میں کچھ شرپسندوں کے ذریعے اتحاد کو توڑنے کی کوششوں کے باوجود آپ سب کو متحد رہنا ہے۔ بسا اوقات لوگ انصاف کی لمبی لڑائی میں کچھ دنوں بعد تھک ہار کر بیٹھ جاتے ہیں اور سمجھوتا کر لیتے ہیں جس کے نتیجے میں جہاں ظالموں کے حوصلے بلند ہوتے ہیں وہیں انصاف کے لئے لڑنے والے و مدد کرنے والے لوگوں کے حوصلے کمزور ہو جاتے ہیں، آپ ایسی غلطی مت کیجئے گا۔ موصوف نے سماج کی اندرونی خرابیوں کی اصلاح کی طرف بھی توجہ دلائی اور عوام سے اپیل کی کہ وہ دین سے مضبوط تعلق قائم کریں۔ انہوں نے مزید کہا کہ ’’ جماعت اسلامی ہند شیر خوار بچی کے بہیمانہ قتل کی شدید مذمت کرتی ہے اور ذمہ دار پولیس اہلکاروں کے خلاف فوری کارروائی کا مطالبہ کرتی ہے۔ اس موقع پر وفد میں ایڈوکیٹ لیاقت ، مولانا طاہر اور عبید الرحمن ( معاون ناظم ، ضلع میوات ، ہریانہ) بھی موجود تھے جنہوں نے متاثرہ خاندان اور احتجاج کرنے والوں کے ساتھ اظہار یکجہتی کیا۔
