گاندھی نگر: مودی کنیت ہتک عزتی کے معاملہ میں گجرات ہائی کورٹ نے اپنا فیصلہ سناتے ہوئے راہل گاندھی کی عرضی کو خارج کر دیا ہے۔ ہائی کورٹ نے سیشن کورٹ کے اس حکم کو برقرار رکھا ہے جس میں ‘مودی کنیت’ کے ریمارک کے خلاف ہتک عزت کیس میں راہل گاندھی کی سزا پر روک لگانے سے انکار کیا گیا تھا۔
اس فیصلے کے بعد راہل گاندھی الیکشن نہیں لڑ سکیں گے اور نہ ہی رکن پارلیمنٹ (ایم پی) کی اپنی حیثیت کی معطلی کو منسوخ کرنے کا مطالبہ کر سکیں گے۔ وہ ہائی کورٹ کے حکم کے خلاف سپریم کورٹ میں اپیل کر سکتے ہیں۔ گجرات ہائی کورٹ نے کہا کہ ٹرائل کورٹ کی سزا کا حکم مناسب ہے، مذکورہ حکم میں مداخلت کی ضرورت نہیں ہے۔ اس لیے عرضی خارج کی جاتی ہے۔ عدالت نے مزید کہا کہ راہل گاندھی کے خلاف کم از کم 10 مجرمانہ مقدمات زیر التوا ہیں۔
خیال رہے کہ یہ معاملہ 2019 کے انتخابات کے دوران ایک جلسہ عام سے متعلق ہے جہاں راہل گاندھی نے مودی کنیت پر تبصرہ کیا تھا۔ گجرات کے بی جے پی لیڈر پورنیش مودی نے راہل گاندھی کے خلاف مقدمہ درج کرایا تھا۔ ان کا کہنا تھا کہ راہل گاندھی مودی سرنام کے لوگوں کو بدنام کیا ہے۔
جسٹس پرچھک نے مئی میں راہل گاندھی کی عرضی پر سماعت کرتے ہوئے کوئی عبوری راحت دینے سے انکار کر دیا تھا اور کہا تھا کہ وہ موسم گرما کی تعطیلات کے بعد حتمی حکم جاری کریں گے۔
سورت کی میٹروپولیٹن مجسٹریٹ عدالت نے 23 مارچ کو راہل گاندھی کو پورنیش مودی کی طرف سے 2019 کے ایک مقدمے میں تعزیرات ہند (آئی پی سی) کی دفعہ 499 اور 500 (مجرمانہ ہتک عزت) کے تحت قصوروار قرار دیتے ہوئے دو سال جیل کی سزا سنائی تھی۔ اس فیصلے کے بعد گاندھی کو عوامی نمائندگی ایکٹ کے تحت پارلیمنٹ کی رکنیت سے نااہل قرار دے دیا گیا تھا۔ راہل گاندھی کیرالہ کے وائناڈ سے لوک سبھا کے رکن تھے۔
