انجینئرنگ کے طالب علم کی ساتویں منزل سے چھلانگ لگا کر خودکشی

کوزی کوڈ: کیرالہ کے کالی کٹ کے نیشنل انسٹی ٹیوٹ آف ٹیکنالوجی (این آئی ٹی) میں بی ٹیک انجینئرنگ کے تیسرے سال کے طالب علم نے بوائز ہاسٹل کی ساتویں منزل سے چھلانگ لگا کر خودکشی کرلی۔متاثرہ کی شناخت ممبئی کے یوگیشور ناتھ کے طور پر ہوئی ہے۔ یوگیشور نے خودکشی کرنے سے پہلے اپنے والدین کو ایک دل دہلا دینے والا پیغام بھیجا اور شام تقریباً 06.30 بجے بوائز ہاسٹل کی ساتویں منزل سے چھلانگ لگا دی۔موصولہ اطلاعات کے مطابق ممبئی میں رہنے والے یوگیشور کے والدین کو پریشان کن پیغامات موصول ہوئے۔ اس کے بعد اس نے فوراً ہاسٹل وارڈن کو اطلاع دی۔ان کی فوری کارروائی سے ہاسٹل کے اہلکار اور سیکورٹی اہلکار موقع پر پہنچے جہاں انہوں نے نوجوان طالب علم کو خون میں لت پت زمین پر پڑا پایا۔ اسے فوری طور پر کوزی کوڈ میڈیکل کالج اسپتال (ایم سی ایچ) لے جایا گیا جہاں ڈاکٹروں نے اسے مردہ قرار دیا۔
کنّامنگلم پولیس نے غیر فطری موت کا معاملہ درج کرکے تحقیقات شروع کردی ہے۔ ادھر لاش کو پوسٹ مارٹم کے لیے ایم سی ایچ میں رکھا گیا ہے۔موصولہ رپورٹوں کے مطابق افسوسناک خودکشی کا تعلق مناسب مشاورتی تعاون کی کمی اور این آئی ٹی کالی کٹ میں طلباء کو درپیش تعلیمی دباؤ میں اضافہ سے ہوسکتا ہے۔ یہ تشویشناک انکشاف تعلیمی اداروں کے اندر ذہنی صحت کے بہتر وسائل اور تعلیمی مدد کی فوری ضرورت پر زور دیتا ہے۔