جھارکھنڈ اسمبلی انتخاب کے پہلے مرحلے کی ووٹنگ ہو چکی ہے اور دوسرے مرحلے میں 20 نومبر کو ووٹ ڈالے جانے والے ہیں۔ ایسے میں بی جے پی اور کانگریس سمیت دیگر سیاسی پارٹیاں اپنی تشہیر کے لیے کئی طرح کے اشتہار پرنٹ، ویڈیو اور آڈیو کے توسط سے جاری کر چکے ہیں۔ لیکن جھارکھنڈ میں بی جے پی کے ایک اشتہار نے الیکشن کمیشن کو کارروائی کرنے پر مجبور کر دیا ہے۔ کمیشن نے اشتہار کو ضابطہ اخلاق کی خلاف ورزی قرار دیتے ہوئے اسے فوراً ہٹانے کی ہدایت دی ہے۔
‘اے بی پی نیوز’ کے مطابق مرکزی الیکشن کمیشن نے کانگریس اور جے ایم ایم کی شکایت پر جھارکھنڈ کے چیف الیکٹورل آفیسر کو کہا ہے کہ وہ ریاستی بی جے پی کی سوشل میڈیا ٹیم کے ذریعہ ‘ایکس’ اور فیس بُک صفحہ پر ڈالے گئے اشتہار پر کارروائی کرتے ہوئے اسے ہٹانے کی ہدایت جاری کریں اور جہاں جہاں بھی یہ اشتہار ہے اسے فوری طور پر ہٹایا جائے۔
دراصل جس اشتہار کو لے کر الیکشن کمیشن میں شکایت کی گئی تھی اس میں کہا گیا تھا ”پورے جھارکھنڈ کا کایا پلٹ کر دیں گے”۔ الیکشن کمیشن نے کہا کہ کانگریس اور جھارکھنڈ مکتی مورچہ کی شکایت کو دیکھنے کے بعد پایا گیا کہ شروعاتی طور پر جھارکھنڈ بی جے پی کے ذریعہ جاری کیا گیا یہ اشتہار ضابطہ اخلاق کی خلاف ورزی ہے۔
