سڑک پر نما ز اداکرنے پر ڈرائیور گرفتار

احمد آباد: گجرات پولیس نے بناسکانٹھا ضلع میں سڑک پر نماز پڑھنے والے ٹرک ڈرائیور کو گرفتار کر لیا۔ ڈرائیور کی شناخت باچا خان (37)کے طور پر ہوئی ہے۔ پولیس نے بتایا کہ اسے سوشل میڈیا پر ایک ویڈیو وائرل ہونے کے بعد گرفتار کیا گیا۔ جس میں ڈرائیور پالن پور شہر کے قریب ایک چوراہے پر کھڑے اپنے ٹرک کے آگے نماز پڑھتے ہوئے نظر آتا ہے۔پولیس نے بتایا کہ یہ واقعہ 12 جنوری کو ایک مصروف چوراہے کے قریب ہائی وے پر پیش آیا۔ خان نے اپنا ٹرک روکا اور نماز پڑھنے لگا۔ اسی دوران کسی نے ویڈیو ریکارڈ کر کے وائرل کر دی۔ جس کے بعد پولیس نے معاملے میں مداخلت کی۔خان کے خلاف دفعہ 283 عوامی راستے میں خطرہ، 186 سرکاری ملازم کے فرائض کی انجام دہی میں رکاوٹ اور 188 سرکاری ملازم کے ذریعہ جاری کردہ حکم کی نافرمانی کے تحت ایف آئی آر درج کی گئی ہے۔