غازی آباد:غازی آباد کے ہنڈن ایئر پورٹ سے اب پٹنہ کے لیے بھی فلائٹ دستیاب ہوگی۔ یکم مئی سے اس کی شروعات ہونے والی ہے۔ ایئر انڈیا ایکسپریس کو اڑان کی اجازت مل گئی ہے۔ 180 سیٹ والا یہ طیارہ روزانہ ہنڈن سے پٹنہ اور پٹنہ سے ہنڈن کے لیے اڑان بھرے گا۔ اس کی شروعات ہونے سے این سی آر میں رہنے والے بہار کے لوگوں کو کافی سہولت ہو جائے گی۔
ہنڈن ایئرپورٹ سے کمرشیل اڑانوں پر لگی روک ہٹنے کے بعد کنکٹیویٹی لگاتار بڑھ رہی ہے۔ مارچ میں 7 شہروں کے لیے نئی اڑانیں شروع ہوئی تھیں اور اب یکم مئی سے پٹنہ کے لیے بھی سیدھی اڑان ملے گی۔ ہنڈن ایئر پورٹ سے جڑنے والا پٹنہ 13 واں شہر ہوگا۔ کمپنی نے پٹنہ کی اڑان کی بکنگ بھی شروع کر دی ہے۔ بتایا جاتا ہے کہ شروعات میں کچھ چھوٹ بھی دی جا رہی ہے۔
ٹکٹ کی قیمت 4 ہزار روپے سے شروع ہو رہی ہے، جو وندے بھارت ٹرین کی ایگزیکٹیو چیئر کار کے کرایے سے بھی کم ہے۔ پٹنہ سے صبح طیارہ 11:50 بجے اڑان بھرے گا اور دوپہر میں 1:40 بجے ہنڈن پہنچے گا۔ ہنڈن سے دوپہر 2:25 بجے اڑان شروع ہوگی اور شام 4:10 بجے اڑان پٹنہ پہنچے گی۔ہنڈن ایئرپورٹ کے ڈائرکٹر امیش یادو کا کہنا ہے کہ کمپنی نے بکنگ شروع کر دی ہے۔ اس اڑان کے شروع ہونے سے غازی آباد کے ساتھ نوئیڈا، میرٹھ اور ہاپڑ میں رہنے والے لوگوں کو پٹنہ جانے-آنے میں بڑی سہولت ہو جائے گی۔
بتایا جاتا ہے کہ ہنڈن ایئر پورٹ سے جلد ہی اتر پردیش کی راجدھانی لکھنؤ سمیت 4 اور شہروں کے لیے بھی اڑان سروس شروع ہوگی۔ رکن پارلیمنٹ اتل گرگ کا کہنا ہے کہ پٹنہ کے لیے اڑان خدمات شروع ہونے سے بہار کے رہنے والے لوگوں کو فائدہ ہوگا۔ اب غازی آباد کے ساتھ این سی آر میں رہنے والے لوگ دو گھنٹے سے کم وقت میں ہی بہار تک پہنچ سکیں گے۔ ہنڈن ایئئر پورٹ پہنچنے میں غازی آباد، نوئیڈا اور میرٹھ سے دہلی ایئر پورٹ جانے میں لگنے والے وقت سے بھی آدھا بھی نہیں لگے گا۔
