چندریان 3 چاند کے آربٹ میں داخل ہونے میں کامیاب

سری ہری کوٹا: اسرو نے چندریان 3 کے بارے میں اہم اطلاع دی ہے۔ ہندوستان کا مشن چاند کے مدار میں داخل ہو گیا ہے۔ یہ کامیابی اس لئے بھی خاص ہے کہ اسے سب سے مشکل مرحلہ سمجھا جا رہا تھا۔ اب 23 اگست کو چندریان-3 چاند کی سطح پر ‘سافٹ لینڈنگ کرنے کی کوشش کرے گا۔ یکم اگست کے اوائل میں خلائی جہاز نے ٹرانس لونر انجیکشن کے ذریعے 288 کلومیٹر ضرب 3.7 لاکھ کلومیٹر کا مدار حاصل کیا تھا اور چاند کے دائرہ اثر میں داخل ہوا تھا۔
اسرو نے ایک بیان میں کہا کہ چندریان 3 کو چاند کے مدار میں کامیاب طریقہ سے نصب کر دیا گیا ہے ۔ مشن آپریشنز کمپلیکس (ایم او ایکس)، آئیسٹریک ( اسرو ٹیلی میٹری، ٹریکنگ اور کمانڈ نیٹ ورک) ، بنگلور سے پیرلیون پر ریٹرو برننگ کا کمانڈ پورا کیا گیا ہے ۔ پیرلیون خلائی جہاز کا چاند سے قریب ترین مقام ہے ۔
واضح ہو کہ 14 جولائی کو لانچ ہونے کے بعد سے تین ہفتوں میں اسرو چندریان -3 خلائی جہاز کو زمین کے مدار سے دور مدار میں لے جا رہا ہے۔ اسی سلسلہ میں کل یعنی اتوار کی رات 11 بجے کے قریب یہ گاڑی چاند کے مدار میں پہلا چکر مکمل کرے گی۔