پانچ سیشنوں پر مشتمل پارلیمنٹ کا خصوصی اجلاس طلب

نئی دہلی : حکومت نے 18 سے 22 ستمبر تک پارلیمنٹ کا خصوصی اجلاس طلب کیاہے، جس میں پانچ سیشن ہوں گے۔ پارلیمانی امور کے وزیر پرہلاد جوشی نے جمعرات کو یہ جانکاری دی۔ پارلیمانی امور کے وزیر جوشی نے سوشل میڈیا سائٹ ایکس ( ٹویٹر) پر اپنی پوسٹ میں کہا کہ پارلیمنٹ کا خصوصی اجلاس (17 ویں لوک سبھا کا 13 واں اجلاس اور راجیہ سبھا کا 261 واں اجلاس) 18 سے 22 ستمبر تک بلایا گیا ہے۔
پارلیمنٹ کے اس خصوصی اجلاس کے ایجنڈے کے بارے میں سرکاری طور پر کچھ نہیں بتایا گیا ہے۔ لیکن یہ سیشن 9 اور 10 ستمبر کو قومی دارالحکومت میں جی 20 سربراہی اجلاس کے چند دن بعد ہونے جا رہا ہے۔ جوشی نے کہا کہ پارلیمنٹ کے اس خصوصی اجلاس میں پانچ میٹنگیں ہوں گی۔ پارلیمانی امور کے وزیر نے کہا کہ وہ امرت کال کے دوران منعقد ہونے والے اس خصوصی اجلاس کے دوران پارلیمنٹ میں بامعنی بحث کی امید رکھتے ہیں۔
مرکزی حکومت نے اعلان کیا ہے کہ پارلیمنٹ کا پانچ روزہ خصوصی اجلاس 18 سے 22 ستمبر کے درمیان بلایا جائے گا۔ ابھی تک یہ واضح طور پر نہیں بتایا گیا ہے کہ وہ کون سے بل ہیں جن کے لیے یہ خصوصی اجلاس بلایا جا رہا ہے۔ اس بار مانسون اجلاس کافی ہنگامہ خیز رہا تھا، جس کی وجہ سے پارلیمنٹ کے دونوں ایوانوں میں زیادہ کام نہیں ہو سکا تھا۔ ذرائع کے مطابق اس اجلاس کے دوران 10 سے زائد اہم بل پیش کئے جائیں گے۔