مہاراشٹر واقع ایک فرٹیلائزر پلانٹ میں دھماکہ کی خبر سامنے آ رہی ہے۔ واقعہ سانگلی ضلع کا ہے جہاں ایک فرٹیلائزر پلانٹ کے ریکٹر میں دھماکہ کے بعد گیس رساؤ ہو گیا۔ اس گیس رساؤ کی زد میں آنے سے 2 خواتین سمیت 3 لوگوں کی موت واقع ہو گئی ہے۔ اس حادثہ میں دیگر 9 اشخاص زخمی بھی ہوئے ہیں جن کا اسپتال میں علاج چل رہا ہے۔
یہ واقعہ جمعرات کی دیر شام کا بتایا جا رہا ہے جس کے بارے میں جمعہ کو پولیس کے ذریعہ جانکاری دی گئی ہے۔ ایک افسر نے آج بتایا کہ واقعہ جمعرات کی شام تقریباً 6.30 بجے کا ہے۔ کڈیگاؤں تحصیل کے شالگاؤں ایم آئی ڈی سی میں میانمار کیمیکل کمپنی میں یہ واقعہ پیش آیا۔ پولیس کا کہنا ہے کہ فرٹیلائزر پلانٹ میں کیمیکل دھواں چھوڑنے کے دوران دھماکہ ہوا۔ اس کے بعد گیس کا رساؤ بھی شروع ہو گیا۔
کڈیگاؤں پولیس اسٹیشن کے سینئر انسپکٹر سنگرام شیوالے کا کہنا ہے کہ ’’گیس لیک کے سبب یونٹ کے تقریباً 12 افراد متاثر ہوئے۔ انھیں اسپتال میں داخل کرایا گیا۔ ان میں سے 2 خواتین اور ایک سیکورٹی گارڈ کی موت ہو گئی۔ باقی 9 لوگوں کا علاج اسپتال میں جاری ہے۔‘‘ سانگلی کے پولیس سپرنٹنڈنٹ سندیپ گھوگے نے اس معاملے مین بتایا کہ امونیا گیس کے رساؤ کا اندیشہ ہے۔ متاثرین میں سے 7 کا علاج کراڈ کے سہیادری اسپتال میں چل رہا ہے جہاں 5 متاثرین آئی سی یو میں ہیں۔ مہلوک خواتین کی شناخت سانگلی ضلع کے یتگاؤں کی سوچیتا اُتھلے اور ستارا ضلع واقع مسور کی نیلم ریتھکر کے طور پر کی گئی ہے۔
