پنجاب میں تنہا الیکشن لڑنے کا بی جے پی کافیصلہ

چنڈی گڑھ: بھارتیہ جنتا پارٹی (بی جے پی) پنجاب میں لوک سبھا الیکشن اکیلے لڑے گی۔ پارٹی کی ریاستی یونٹ کے سربراہ سنیل جاکھڑ نے منگل کو یہ جانکاری دی۔ یہ اعلان شرومنی اکالی دل (ایس اے ڈی) اور بی جے پی کے درمیان پارلیمانی انتخابات کے لیے دوبارہ اتحاد کے لیے بات چیت کی قیاس آرائیوں کے درمیان کیا گیا ہے۔سات مرحلوں پر مشتمل انتخابات کے آخری مرحلے میں پنجاب میں لوک سبھا کی 13 سیٹوں کے لیے ووٹنگ یکم جون کو ہوگی۔ جاکھڑ نے سوشل میڈیا پلیٹ فارم ایکس پر ایک پوسٹ میں کہا، ’’بی جے پی پنجاب میں اکیلے الیکشن لڑنے جا رہی ہے۔ پارٹی نے یہ فیصلہ لوگوں اور پارٹی کارکنوں سے ملنے والے ‘فیڈ بیک کے بعد لیا ہے۔
انہوں نے کہاکہ پارٹی نے یہ فیصلہ پنجاب کے عوام، پارٹی کارکنوں، رہنماؤں اور کسانوں کی رائے کی بنیاد پر کیا ہے۔ یہ فیصلہ پنجاب کے تمام تاجروں، مزدوروں اور پسماندہ طبقات کے روشن مستقبل کے لیے کیا گیا ہے۔جاکھڑ نے کہا کہ وزیراعظم نریندر مودی کی قیادت میں بی جے پی نے جو کام کیا ہے وہ کسی سے ڈھکا چھپا نہیں ہے۔ بی جے پی لیڈر نے یہ بھی دعویٰ کیا کہ پچھلے 10 سالوں میں کسانوں کی فصلیں کم از کم امدادی قیمت پر خریدی گئی ہیں۔