بہار ٹاپرس گھوٹالے کے ماسٹر مائنڈ امت کمار کے ٹھکانے پر چھاپہ

نئی دہلی: انفورسمنٹ ڈائریکٹوریٹ (ای ڈی) نے بہار میں 2016 کے ٹاپرس گھوٹالہ معاملہ میں کلیدی ملزم بچہ رائے عرف امت کمار سے 3 کروڑ روپے سے زیادہ نقد اور 80 سے زیادہ جائیداد کے دستاویزات ضبط کیے ہیں۔ ای ڈی کی ٹیم رائے کے احاطے میں نئے تعمیراتی کام کی رپورٹوں کے بعد حرکت میں آئی، جسے ایجنسی نے پہلے اس گھوٹالے کی تحقیقات کے سلسلے میں منسلک کر لیا تھا۔ای ڈی ذرائع نے بتایاکہ ہفتہ کو تلاشی کے دوران ٹیم نے نقد رقم اور جائیداد کے دستاویزات کو ضبط کیا۔ ذرائع نے بتایا کہ ای ڈی دستاویزات کی جانچ پڑتال کر رہی ہے۔ ذرائع نے مزید کہا کہ ایجنسی کو رائے کے بی ایڈ کالج میں بے ضابطگیوں سے متعلق کئی شواہد بھی ملے ہیں۔ اس کے علاوہ سرکاری فنڈز میں خردبرد کے شواہد بھی ملے ہیں۔ ای ڈی نے بہار کے ویشالی کے بھگوان پور علاقے میں کئی مقامات کی تلاشی لی تھی۔مارچ 2018 میں ای ڈی نے 2016 میں ریاست کو ہلا کر رکھ دینے والے بہار ٹاپر گھوٹالے کے کلیدی ملزم کے 4.53 کروڑ روپے کے اثاثوں کو ضبط کیا تھا، جس میں 29 پلاٹ اور دس بینک کھاتوں میں جمع رقم بھی شامل تھی۔ منی لانڈرنگ کی روک تھام ایکٹ (پی ایم ایل اے) کے تحت ویشالی ضلع کے ویشن رائے کالج کے سکریٹری اور پرنسپل کے خلاف کارروائی کی گئی۔
یہ گھوٹالہ 31 مئی 2016 کو اس وقت سامنے آیا جب بہار اسکول ایجوکیشن بورڈ (بی ایس ای بی) کے آرٹس اینڈ ہیومینیٹیز ٹاپر روبی رائے، سائنس ٹاپر سوربھ شریشٹھ اور سائنس اسٹریم میں تیسرے ٹاپر راہل کمار کا نیوز ٹی وی چینلز نے انٹرویو کیا اور بنیادی سوالات پوچھے۔ جواب اس کے بعد تحقیقات شروع کی گئی جس کے بعد ای ڈی نے 2017 میں بہار پولیس کی طرف سے درج کی گئی ایف آئی آر کی بنیاد پر مقدمہ درج کیا۔