کیشو پرساد موریہ کے ذریعےوزیر اعظم مودی اور وزیراعلیٰ یوگی کی تعریف

مرزا پور:لوک سبھا انتخابات کے بعد سے اتر پردیش کے وزیر اعلیٰ یوگی آدتیہ ناتھ اور نائب وزیر اعلیٰ کیشو پرساد موریہ کے درمیان اختلافات کی بحث کو کیشو پرساد نےختم کر نے کی کوشش کی ہے۔ مرزا پور میں منعقدہ پروگرام میں انہوں نے نہ صرف وزیر اعظم مودی اور وزیراعلیٰ یوگی کی تعریف کی بلکہ دونوں لیڈروں کو بہترین وزیراعظم اور وزیر اعلیٰ بھی بتایا۔
مرزا پور میں پارٹی کارکنوں سے خطاب کرتے ہوئے نائب وزیر اعلیٰ نےا سٹیج سے وزیر اعلیٰ کی تعریف کی۔ مرکزی اور ریاستی حکومتوں کی حصولیابیوں کا ذکرکرتے ہوئے انہوں نے کہاکہ مرکز اور ریاست میں بی جے پی کی حکومت ہے، آپ یہ بھی جانتے ہیں کہ آزاد ہندوستان کی تاریخ میں ہماری ڈبل انجن والی حکومت ملک میں اچھا کام کر رہی ہے۔ ملک میں وزیراعظم مودی جیسا کوئی دوسرا لیڈر نہیں ہے اور ملک میں یوگی آدتیہ ناتھ جیسا وزیر اعلیٰ کوئی نہیں ہے۔انہوں نے یہ بھی کہاکہ `ہمارے لیڈر وزیراعظم مودی دنیا کے سب سے بااثر اور طاقتور لیڈر ہیں اور وزیراعلیٰ یوگی دوسرے وزرائے اعلیٰ کے مقابلے میں بہترین ہیں، ان کے جیسا کوئی نہیں، ریاست میں بہترین کام کر رہے ہیں۔