تلنگامہ میں پرائیویٹ فیکٹری میں دھماکہ۔6افراد ہلاک

حیدرآباد: شاد نگر میں واقع ایک پرائیویٹ فیکٹری میں جمعہ کی شام دھماکہ سے زبردست آگ لگ گئی۔ آگ لگتے ہی کارکنان اور عملہ خوف کے مارے باہر بھاگ گیا۔ منصف کی خبر کے مطابق گہرے دھوئیں کی وجہ سے مقامی عوام بھی خوفزدہ ہوگئے۔اطلاع ملنے پر فائر بریگیڈ نے موقع پر پہنچ کر آگ پر قابو پالیا۔ پولیس نے تصدیق کی کہ آگ ساؤتھ گلاس نامی نجی کمپنی میں بھٹی پھٹنے سے لگی۔ آگ لگنے سے 6 افراد ہلاک اور 15 سے زائد افراد شدید زخمی ہو گئے۔پولیس نے زخمیوں کو قریبی اسپتالوں میں منتقل کردیا۔ ڈاکٹروں کا کہنا ہے کہ زیر علاج تین افراد کی حالت تشویشناک ہے۔ زخمیوں میں سے کئی کے سر اور ٹانگوں پر چوٹیں آئی ہیں۔
پولیس نے دعویٰ کیا کہ تمام متاثرہ مزدوروں کا تعلق دوسری ریاستوں سے ہے تاہم کمپنی کے دیگر ملازمین نے مہلوکین کے خاندانوں کو مالی امداد جاری کرنے تلنگانہ حکومت سے مطالبہ کیا ہے۔ انہوں نے زخمیوں کے بہتر علاج کی درخواست کی۔اسی دوران وزیر اعلیٰ تلنگانہ ریونت ریڈی نے جو دہلی میں ہیں، یہاں متعلقہ اعلی سرکاری عہدیداروں سے بات چیت کی اور تفصیلات حاصل کرنے کے بعد زخمیوں کے بہتر سے بہتر علاج کی ہدایت دی۔