کینیڈا میں24 سالہ ہندوستانی طالب علم کا قتل

اوٹاوا: کینیڈا کے شہر وینکوور کے علاقے سن سیٹ میں 24 سالہ ہندوستانی طالب علم کو اس کی کار میں گولی مار کر ہلاک کر دیا گیا۔ پولیس نے اتوار کو یہ جانکاری دی۔ وینکوور پولیس نے ایک بیان میں کہا کہ 24 سالہ چراغ انٹیل علاقے میں ایک گاڑی کے اندر مردہ پایا گیا۔ پولیس کی ترجمان تانیہ وزینٹن کے حوالے سے میڈیا کی خبر کے مطابق گولیوں کی آوازیں سننے کے بعد محلے کے لوگوں نے ایمرجنسی سروسز کو کال پولیس افسران کو ایسٹ 55 ویں ایونیو اور مین اسٹریٹ پر بلایاجہاں 24 سالہ چراغ انٹیل علاقے میں ایک گاڑی کے اندر مردہ پایا گیا۔پولیس کا کہنا ہے کہ اس معاملے میں کوئی گرفتاری عمل میں نہیں آئی ہے اور تفتیش جاری ہے۔
مقامی میڈیا رپورٹس کے مطابق چراغ کا خاندان اس کی لاش واپس لانے کے لیے کراؤڈ فنڈنگ ​​کے ذریعے رقم اکٹھا کر رہا ہے۔چراغ کے بھائی رومیت انٹیل، جن کا تعلق ہریانہ سے ہے، نے مقامی میڈیا کو بتایا کہ وہ ہر روز اپنے بھائی اور بہن سے بات کرتے تھے۔ رومیت نے بتایا کہ جس دن حادثہ ہوا اس دن بھی انہوں نے چراغ سے بات کی تھی۔ چراغ، جو ستمبر 2022 میں وینکوور چلا گیا تھا، نے یونیورسٹی کینیڈا ویسٹ سے ایم بی اے مکمل کیا تھا اور حال ہی میں اسے ورک پرمٹ حاصل ہوا تھا۔